این ڈی ایم اے کی جانب سے شدید بارشوں اور سیلابی صورتحال کا الرٹ جاری

منگل 5 اگست 2025 21:40

اسلام آباد(اُردو پوائنٹ اخبارتازہ ترین - این این آئی۔ 05 اگست2025ء)این ڈی ایم اے کے نیشنل ایمرجنسی آپریشن سینٹر نے 8 اگست تک ملک کے بالائی و وسطی علاقوں میں شدید بارشوں اور ممکنہ سیلابی صورتحال کے پیش نظر الرٹ جاری کر دیا۔ترجمان این ڈی ایم اے کے مطابق دریائے چناب (مرالہ، خانکی، قادرآباد) اور دریائے جہلم (منگلا کے بالائی علاقوں) میں درمیانے سے اونچے درجے کے سیلاب کا خدشہ ہے۔

اس کے علاوہ دریائے کابل میں نوشہرہ کے مقام پر تیز بہاؤ اور سوات و پنجکوڑہ کے ندی نالوں میں طغیانی کا امکان ظاہر کیا گیا ہے۔ تربیلا، کالا باغ، چشمہ، تونسہ اور گڈو بیراج میں فی الحال نچلے درجے کا بہاؤ ہے لیکن آئندہ دنوں میں یہ درمیانے درجے تک پہنچ سکتا ہے۔مون سون بارشوں کے باعث گلگت بلتستان کے علاقوں ہنزہ، گھانچے اور شگر میں اچانک سیلابی صورتحال اور ندی نالوں میں طغیانی متوقع ہے۔

(جاری ہے)

تربیلا ڈیم 94 فیصد اور منگلا ڈیم 61 فیصد بھر چکا ہے۔این ڈی ایم اے نے شہری علاقوں، خصوصاً شمال مشرقی و وسطی پنجاب میں نکاسی آب کے لیے متعلقہ اداروں کو ڈی واٹرنگ پمپس تیار رکھنے کی ہدایت کی ہے۔ تمام متعلقہ اداروں کو ممکنہ خطرات سے نمٹنے کے لیے پیشگی اقدامات کی بھی ہدایت دی گئی ہے۔عوام سے اپیل کی گئی ہے کہ حساس علاقوں میں غیر ضروری سفر سے گریز کریں اور تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے اجتناب کریں۔

مقامی انتظامیہ کو نشیبی علاقوں سے فوری نکاسی آب کے لیے ضروری مشینری اور پمپس تیار رکھنے کی ہدایت کی گئی ہے۔این ڈی ایم اے تمام متعلقہ اداروں کو ممکنہ خطرات کے حوالے سے بروقت معلومات فراہم کر رہا ہے تاکہ کسی بھی ہنگامی صورتحال سے مؤثر طریقے سے نمٹا جا سکے۔