کراچی، پراپرٹی ڈیلر کو زخمی حالت میں کار سے پھینک دیا گیا

دس لاکھ روپے تاوان کیلئے اغوا کیا گیا تھا،مجھے سامان سے محروم کر کے نیم بے ہوشی کی حالت میں سڑک پر پھینک دیا گیا، زخمی شہری

بدھ 6 اگست 2025 11:44

کراچی(اُردو پوائنٹ اخبارتازہ ترین - این این آئی۔ 06 اگست2025ء)شہر قائد میں سپر ہائی وے جمالی پل کے قریب ایک شخص کو کار سے زخمی حالت میں پھینکنے کا واقعہ پیش آیا۔زخمی شہری عابد ولد شبیر کا ہولناک بیان سامنے آ گیا ہے، جس میں اس نے بتایا کہ وہ شاہ لطیف ٹاؤن کا رہائشی اور پراپرٹی کے کاروبار سے وابستہ ہے۔عابد کے مطابق اُسے ملیر گلشن قادری سے کرولا کار میں سوار مسلح ملزمان نے اغواء کیا اور دس لاکھ روپے تاوان کا مطالبہ کیا۔

(جاری ہے)

عابد کا کہنا تھا کہ مسلح ملزمان نے میرے ہاتھ پلاسٹک ٹائی سے باندھ دیے گئے اور مجھے مختلف علاقوں میں کئی گھنٹے گھمایا گیا۔عابد نے بتایا کہ اس کے پاس اُس وقت 50 ہزار روپے نقد اور پرس میں کئی بینک چیکس موجود تھے، جو ملزمان نے لوٹ لیے، تشدد کیا اور پاؤں پر گولی مار دی۔ پراپرٹی ڈیلر نے کہا کہ مجھے سامان سے محروم کر کے نیم بے ہوشی کی حالت میں سڑک پر پھینک دیا گیا، مجھے یاد نہیں کہ اسے کہاں پھینکا گیا۔پولیس کے مطابق زخمی شہری کے بیان کی روشنی میں اغواء، ڈکیتی، اور اقدام قتل کی دفعات کے تحت تحقیقات شروع کر دی گئی ہیں۔