Live Updates

ایشیاء کپ سپر فور راؤنڈ؛ ہائی وولٹیج میچ میں پاکستانی ٹیم بھارت کو قابلِ دفاع ہدف دینے میں کامیاب

دبئی کرکٹ سٹیڈیم میں پاکستان نے پہلے کھیلتے ہوئے مقررہ 20 اوورز میں 5 وکٹوں کے نقصان پر 171 رنز بنائے

ساجد علی اتوار 21 ستمبر 2025 21:30

ایشیاء کپ سپر فور راؤنڈ؛ ہائی وولٹیج میچ میں پاکستانی ٹیم بھارت کو ..

دبئی ( اُردو پوائنٹ اخبارتازہ ترین۔ 21 ستمبر 2025ء ) ایشیاء کپ کے سپر فور راؤنڈ کے ہائی وولٹیج میچ میں پاکستانی ٹیم بھارت کو قابلِ دفاع ہدف دینے میں کامیاب ہوگئی۔ تفصیلات کے مطابق دبئی کرکٹ سٹیڈیم میں کھیلے جا رہے میچ میں پاکستان نے پہلے کھیلتے ہوئے مقررہ 20 اوورز میں 5 وکٹوں کے نقصان پر 171 رنز بنائے، پاکستان کے پہلے آؤٹ ہونے والے کھلاڑی فخر زمان تھے، اوپننگ بلے باز 9 گیندوں پر 15 رنز بنا کر ہاردیک پانڈیا کا شکار بنے اور ناقص امپائرنگ کی بھینٹ چڑھ گئے کیوں کہ بھارتی وکٹ کیپر نے جب فخر زمان کا کیچ پکڑا تو گیند گراؤنڈ کو چُھو رہی تھی۔

اس کے بعد بھارت کیخلاف پاکستان بلے بازوں نے بھرپور ’لاٹھی چارج‘ کیا، صاحبزادہ فرحان اور صائم ایوب نے ذمہ دارانہ بیٹنگ کی اور ٹیم کا سکور 10اوورز میں 93 رنز تک پہنچایا اور صائم ایوب 21 رنز بنا کر دوبے کی گیند پر کیچ آؤٹ ہوگئے، حسین طلعت 110 کے مجموعی سکور پر 10 رنز بنا کر کلدیپ یادیو کے ہاتھوں پویلین لوٹ گئے۔

(جاری ہے)

جب پاکستان کا سکور 115 ہوا تو صاحبزادہ فرحان بھی 58 رنز بنا کر دوبے کی گیند پر کیچ دے بیٹھے، انہوں نے 3 چھکوں اور 5 چوکوں کی مدد سے 45 گیندوں پر 58 رنز کی اننگز کھیلی، محمد نواز 149 کے سکور پر 21 رنز بناکر رن آؤٹ ہوئے، کپتان سلمان آغا 17 اور فہیم اشرف 8 گیندوں پر 20 رنز بناکر ناٹ آؤٹ رہے، بھارت کی طرف سے شیوم دوبے نے 2، کلدیپ یادیو اور ہاردیک پانڈیا نے 1,1وکٹ حاصل کی۔

قبل ازیں ایشیاء کپ سپر فور راؤنڈ کے میچ میں بھارت نے پاکستان کے خلاف میچ کا ٹاس جیتا جس کے بعد بھارتی کپتان سوریا کمار یادو نے پاکستان کے خلاف اس ہائی وولٹیج میں پہلے فیلڈنگ کا فیصلہ کیا، پاکستان اور بھارت کے کپتان آج پھر ٹاس کے بعد بغیر ہاتھ ملائے روانہ ہوئے، اس میچ میں بھی اینڈی پائی کرافٹ ہی میچ ریفری ہیں، پاکستانی پلیئنگ الیون میں 2 تبدیلیاں کی گئی ہیں، فہیم اشرف اور حسین طلعت کو ٹیم میں شامل کیا گیا ہے۔

پاکستان آج کے اہم میچ میں صائم ایوب، صاحبزادہ فرحان، فخر زمان، حسین طلعت، فہیم اشرف، سلمان علی آغا، محمد نواز، محمد حارث (وکٹ کیپر)، شاہین شاہ آفریدی، حارث رؤف اور ابرار احمد کے ساتھ میدا میں اترا ہے جب کہ بھارتی ٹیم میں بھی دو تبدیلیاں کی گئی ہیں، جسپریت بمراہ اور ورون چکرورتی کو دوبارہ شامل کیا گیا۔

بتایا جارہا ہے کہ پاکستان اور بھارت کے درمیان اب تک دبئی میں کھیلے گئے چاروں میچز میں بعد میں بیٹنگ کرنے والی ٹیم نے فتح حاصل کی، گزشتہ میچ میں بھارت کی فتح ہوئی تاہم 2021ء کے ٹی ٹوئنٹی ورلڈکپ میں پاکستان نے دس وکٹوں سے ریکارڈ فتح بھی اسی گراؤنڈ میں حاصل کی تھی۔

جب کہ 2022ء کے ٹی ٹوئنٹی ایشیا کپ میں گروپ میچ میں بھارت نے پاکستان کو پانچ وکٹوں سے شکست دی تھی لیکن سپر فور میں پاکستان نے پانچ وکٹوں سے کامیابی حاصل کی تھی، لہذا سابقہ ریکارڈ کی روشنی میں اس میدان میں ٹاس جیت کر پہلے بولنگ کرنے کا فیصلہ کرنے والی ٹیم کو فائدہ پہنچ سکتا ہے۔