یونان کشتی حادثہ 2023ئمیں ملوث ملزم سمیت 5انسانی سمگلرز گرفتار

ملزمان کو چھاپہ مار کارروائیوں میں لاہور ،شیخوپورہ کے مختلف علاقوں سے گرفتار کیا گیا

بدھ 6 اگست 2025 22:51

یونان کشتی حادثہ 2023ئمیں ملوث ملزم سمیت 5انسانی سمگلرز گرفتار

لاہور (اُردو پوائنٹ اخبارتازہ ترین - این این آئی۔ 06 اگست2025ء)ایف آئی اے لاہور زون نے کارروائیاں کر کے یونان کشتی حادثہ 2023ے میں ملوث بدنام زمانہ ملزم سمیت 5انسانی سمگلرز گرفتار کر لیے ۔ترجمان ایف آئی اے کے مطابق گرفتار ملزمان کی شناخت سبطین عباس، بلال احمد، وسیم اعظم، محمد ریاض اور محمد عامر فاروق کے نام سے ہوئی، ملزمان کو چھاپہ مار کارروائیوں میں لاہور اور شیخوپورہ کے مختلف علاقوں سے گرفتار کیا گیا ہے۔

ملزم سبطین عباس نے شہری کو اٹلی ورک ویزا پر بھجوانے کا جھانسہ دے کر 17لاکھ روپے ہتھیائے، ملزم نے شہری کو غیر قانونی طریقے سے بذریعہ کشتی لیبیا سے اٹلی بھجوانے کی کوشش کی۔یونان کی سمندری حدود میں کشتی حادثے کا شکار ہو گئی تھی، کشتی حادثہ میں معصوم شہری لاپتہ ہوگیا تھا، گرفتار ملزم بلال احمد نے شہری سے قطر ورک ویزا پر بھجوانے کے نام پر 6لاکھ 30ہزار روپے بٹورے، ملزم شہری کو بیرون ملک بھجوانے میں ناکام رہا۔

(جاری ہے)

ملزم بھاری رقوم وصول کر کے روپوش ہو گیا تھا، ملزم کے قبضہ سے 13پاکستانی پاسپورٹ بھی برآمد ہوئے، ملزمان وسیم اعظم ،محمد ریاض اور محمد عامر فاروق گلف میڈیکل کنسلٹنٹ کی آڑ میں انسانی سمگلنگ میں ملوث پائے گئے۔گرفتار ملزموں کے قبضے سے 11پاکستانی پاسپورٹ، 6موبائل فون اور دیگر دستاویزی شواہد بشمول اصلی میڈیکل رپورٹس بھی برآمد ہوئی ہیں، گرفتار ملزمان سادہ لوح شہریوں سے ویزا فراڈ کرنے میں ملوث پائے گئے ہیں، ملزمان سے مزید تفتیش جاری ہے۔