محکمہ تعلیم و کھیل کا مشترکہ طور پر سپورٹس فیسٹیولز کے انعقاد پر اتفاق

جمعرات 7 اگست 2025 20:23

لاہور (اُردو پوائنٹ اخبارتازہ ترین - اے پی پی۔ 07 اگست2025ء) وزیر تعلیم رانا سکندر حیات، وزیر کھیل فیصل کھوکھر اور سابق کرکٹر محمد یوسف کی ملاقات میں تعلیمی اداروں میں کھیلوں کے فروغ،گراونڈز کی بحالی اور مشترکہ اقدامات پر تفصیلی تبادلہ خیال کیا گیا۔ملاقات میں تعلیمی اداروں میں کھیلوں کے فروغ کے لیے اقدامات تیز کرنے اور مشترکہ طور پر سپورٹس فیسٹیول کے انعقاد پر اتفاق کیا گیا۔

اس موقع پر یوم آزادی کی مناسبت سے خصوصی سپورٹس سرگرمیوں کے انعقاد کا بھی فیصلہ کیا گیا۔ رانا سکندر حیات اور فیصل کھوکھر کا کہنا تھا کہ سکولوں اور کالجوں میں بنجر میدانوں کو کھیلوں کے لیے کارآمد بنایا جائے گا۔صوبے کے تعلیمی اداروں میں 1000 سپورٹس اکیڈمیاں بنائی جائیں گی جہاں کرکٹ، ہاکی اور دیگر کھیلوں کو فروغ دیا جائے گا جبکہ نوجوانوں کو شام کے اوقات میں تعلیمی اداروں کی گراونڈز کے استعمال کی سہولیات دیں گے۔

(جاری ہے)

وزیر تعلیم نے مزید کہا کہ سابق کرکٹر محمد یوسف سے بطور کوچ خدمات لی جائیں گی،جو گراس روٹ لیول پر نوجوانوں کو تربیت دیں گے۔ رانا سکندر حیات نے کہا کہ نوجوانوں کو انگلینڈ میں ٹریننگ اور کاونٹی کھیلنے کا موقع بھی ملے گا،گراس روٹ لیول پر ٹیلنٹ کو پالش کرنا وقت کا تقاضہ ہے۔اس موقع پر کھیلوں کی سرگرمیوں کے مشترکہ انعقاد کیلئے محکمہ تعلیم و سپورٹس کے افسران پر مشتمل کمیٹی بھی بنا دی گئی۔