خیبرپختونخواہ میں سیاحتی علاقوں کے ہوٹل مالکان کی سہولت کیلئے یونیفارم ٹیکسیشن پالیسی نافذ کرنےکا فیصلہ

پشاور (اُردو پوائنٹ اخبارتازہ ترین۔ 07 اگست 2025ء) خیبرپختونخواہ حکومت نے سیاحتی علاقوں کے ہوٹل مالکان کی سہولت کیلئے یونیفارم ٹیکسیشن پالیسی نافذ کرنےکا فیصلہ کرلیا ہے۔ تفصیلات کے مطابق وزیراعلی خیبر پختونخوا علی امین گنڈاپور سے نتھیا گلی ہوٹل ایسوسی ایشن کے وفد نے ملاقات کی۔ سیاحتی علاقوں میں ہوٹل مالکان کو درپیش مسائل کے حل، سیاحوں کو معیاری سہولیات کی فراہمی اور سیاحت کے فروغ سے متعلق معاملات پر تبادلہ خیال کیا گیا۔

صوبائی کابینہ اراکین خلیق الرحمن اور مزمل اسلم کے علاوہ متعلقہ محکموں کے حکام بھی ملاقات میں موجود۔ وفد نے نتھیاگلی، ناران اور کاغان کے ہوٹل مالکان کو درپیش مسائل سے وزیر اعلی کو اگاہ کیا۔ خیبر پختونخوا میں سیاحت کے فروغ کے بے پناہ مواقع موجود ہیں، ہم اس سلسلے میں ایک مربوط حکمت عملی کے تحت اقدامات اٹھا رہے ہیں، موجودہ صوبائی حکومت عمران خان کے وژن کے مطابق صوبے میں سیاحت کو جدید خطوط پر ترقی دینے کے لئے اقدامات کر رہی ہے، ہم اس مقصد کے لئے نجی سرمایہ کاری کی نہ صرف حوصلہ افزائی کر رہے ہیں بلکہ سرمایہ کاروں کو ہر ممکن سہولیات بھی دے رہے ہیں، سیاحت کے فروغ کے ساتھ ساتھ  سیاحتی مقامات کے قدرتی ماحول کے تحفظ کو یقینی بنانے کے اقدامات کر رہے ہیں۔

(جاری ہے)

قدرتی ماحول ہمارا اثاثہ اور آنے والی نسلوں کی امانت ہے اس کا تحفظ سب پر لازم ہے، اگر حکومت اور نجی شعبہ مل کر کام کریں تو سیاحت کو فروغ ملے گا اور ماحول کا تحفظ بھی ممکن ہوگا، ہم صوبے میں مزید تین نئے سیاحتی مقامات کو فروغ دے رہے ہیں، سیاحتی مقامات تک رابطہ سڑکوں کی تعمیر پر کام جاری ہے۔ علی امین گنڈاپور نے کہا کہ ٹیکس دہندگان کی سہولت کے لئے ٹیکسوں کی وصولی کے نظام کو ڈیجیٹائز کیا جا رہا ہے، اس سلسلے میں ڈیجیٹل پیمنٹ سسٹم کا نظام متعارف کیا گیا ہے، ٹیکس دہندگان ٹیکسوں کی ادائیگیوں کے لئے ڈیجیٹل پیمنٹ سسٹم کا استعمال کریں، اس سے ٹیکسوں کی ادائیگی اور وصولیوں کے نظام میں مکمل شفافیت آئے گی، سیاحتی علاقوں کے ہوٹل مالکان کی سہولت کے لئے یونیفارم ٹیکسیشن پالیسی نافذ کی جائے گی۔

سیاحتی علاقوں کی ہوٹل انڈسٹری کا سروے کرنے کے بعد ٹیکسوں کی ادائیگی کے لئے پانچ سالہ پالیسی مرتب کی جائے گی، سیاحتی علاقوں کے ہوٹل مالکان سے مخلتف قسم کے ٹیکسوں کی وصولی ایک  ادارے کے ذریعے کی جائے گی، علی امین گنڈاپور نے کہا کہ نتھیاگلی میں پانی کی عدم دستیابی کے دیرینہ مسئلے کو مستقل بنیادوں پر حل کرنے پر کام ہو رہا ہے۔ ناران، کاغان میں سیاحوں کے لئے ہسپتال کا منصوبہ سالانہ ترقیاتی پروگرام میں شامل کیا گیا ہے، ناران، کاغان تک تین کلومیٹر رابطہ سڑک کی بحالی اور کشادگی پر کام شروع کیا جائے گا، نتھیاگلی ہوٹل ایسوسی ایشن غیر رجسٹرڈ ہوٹلوں کو ٹیکس نیٹ میں لانے کے لئے حکومت کے ساتھ تعاون کرے۔

وفد نے ملاقات کے لئے وقت دینے اور ان کے مسائل کے حل میں دلچسپی لینے پر وزیر اعلیٰ کا شکریہ اور صوبائی حکومت کو ہر ممکن تعاون کی یقین دہانی کرائی۔