رواں سال دوسری سہ ماہی کے دوران 456.3 ارب روپے کی ریکارڈ بازیابی کی گئی ،نیب

ہفتہ 9 اگست 2025 13:51

اسلام آباد (اُردو پوائنٹ اخبارتازہ ترین - اے پی پی۔ 09 اگست2025ء) قومی احتساب بیورو (نیب)نے عوامی مفاد کے تحفظ اور لوٹی گئی قومی دولت کی بازیابی کے پختہ عزم کا اعادہ کرتے ہوئے کہا ہے کہ رواں سال (2025 )کی دوسری سہ ماہی (اپریل تا جون )کے دوران 456.3 ارب روپے کی ریکارڈ بازیابی کی گئی ۔ نیب سے جاری اعلامیہ کے مطابق رواں سال کے ابتدائی 6 ماہ میں مجموعی طور پر 31 .547 ارب روپے کی بازیابی کی گئی ، اس دوران 33 .532 ارب روپے مالیت کی منقولہ و غیر منقولہ جائیدادیں وفاقی و صوبائی وزارتوں ، محکموں اور مالیاتی اداروں کے حوالے کی گئیں، اسی طرح پہلی ششماہی میں دھوکہ دہی کے مختلف مقدمات میں 12,611 متاثرین کو ان کی لوٹی ہوئی رقوم بھی واپس دلوائی گئیں۔

نیب راولپنڈی نے اسلام آباد کے سیکٹر 11 -E میں واقع 51 کنال قیمتی سرکاری اراضی (29 ارب روپے مالیت) برآمد کر کے سی ڈی اے کے حوالے کی جبکہ عوام سے دھوکہ دہی کے بڑے مقدمہ (B4U) میں 3 ارب روپے کی رقم بازیاب کی گئی جسے 17,214 متاثرین میں تقسیم کیا جائے گا۔

(جاری ہے)

مزید برآں نیب سکھر نے نیشنل ہائی وے اتھارٹی کی 25 ارب روپے مالیت کی زمین کی بازیابی کے علاوہ سندھ کے محکمہ تعلیم و خواندگی کی 127 کنال اور 15 مرلہ اراضی جس کی مالیت 160.895 ملین روپے ہے بھی بازیاب کرائی ۔اسی طرح نیب لاہور نے ایڈن کیس میں ریکور شدہ 3.2 ارب روپے کی رقم 11,880 متاثرین میں تقسیم کی جبکہ پاک عرب ہاؤسنگ کیس میں 9 .3 ارب روپے مالیت کی 8 جائیدادیں بھی بازیاب کرائی گئیں جو 2,500 متاثرین کو واپس کی جائیں گی۔\932