الخدمت کے تحت فیڈرل بی ایریا نصیرآبادمیں کلینک اور فارمیسی کا افتتاح کردیا گیا

کراچی (اُردو پوائنٹ اخبارتازہ ترین - این این آئی۔ 09 اگست2025ء)الخدمت کراچی کے تحت فیڈر ل ایریا نصیر آباد میں کلینک اورفارمیسی کا افتتاح کردیا گیا ہے۔کلینک وفارمیسی کا افتتاح گزشتہ روز سی ای او FITEوسابق چیئر مین ایف بی ایریا ایسوسی ایشن آف ٹریڈ اینڈ انڈسٹری بابر خان نے کیا ۔اس موقع پر افتتاحی تقریب سے چیف ایگز یکٹو الخدمت کراچی نوید علی بیگ ،امیر جماعت اسلامی ضلع گلبرگ کامران سراج نے بھی خطاب کیا ،تقریب میں ڈایریکٹر الخدمت ڈائیگنوسٹک سروسز ڈاکٹر عظیم الدین،ڈائریکٹر ہیلتھ سروسز الخدمت ڈاکٹر ثاقب انصاری ،ڈائریکٹر فارمیسی سروسز سید جمشید احمد موجود تھے جبکہ تقریب میں معززین علاقہ نے بھی شرکت کی ۔

مہمان خصوصی سی ای او FITEسابق چیئر مین ایف بی ایریا ایسوسی ایشن آف ٹریڈ انڈسٹری بابر خان نے اپنے خطاب میں کہا کہ الخدمت شہریوں کو صحت کی جدید اور معیاری سہولتیں فراہم کر رہی ہے جبکہ اس کی ڈائیگنوسٹک لیب میں ٹیسٹ کی سہولتیں اعلیٰ معیار کے مطابق اور ارزاں نرخوں پر فراہم کی جارہی ہیں ۔

(جاری ہے)

الخدمت لوگوں کی خدمت پر یقین رکھتی ہے ۔کراچی دنیا کے بدترین شہروں میں 170ویں نمبر پر ہے ،اس شہر میں بے پناہ مسائل ہیں ،اس کے باوجود الخدمت عوامی خدمت کے کام کر رہی ہے جو قابل قدر بات ہے ۔

فیڈرل بی ایریا کے مکینوں کیلئے الخدمت کی جانب سے معیاری کلینک اور فارمیسی کے قیام پر اسے مبارک باد پیش کرتے ہیں اور یہاں کے مکینوں سے کہتے ہیں کہ اس سہولت سے فائدہ اٹھائیں ۔ چیف ایگز یکٹو الخدمت نوید علی بیگ نے کہا ہے کہ یہ ایک میڈیکل سینٹر نہیں ہے ،الخدمت کے اس طرح کے درجنوں میڈیکل سینٹر ز،فارمیسز اور کلینکس کراچی میں موجود ہیں ،الخدمت اس بات کا اہتمام کر تی ہے کہ سفید پوش طبقے کو بہترین علاج کی سہولتیں ،ادویات میسر آئیں اور معیاری ڈائیگنوسٹک سروسز فراہم کی جائیں ۔

نوید علی بیگ نے کہا کہ کراچی کے عوام صحت کے شعبے میں پریشانیوں کا سامنا کررہے ہیں ،علاج اور تعلیم کی سہولت فراہم کرنا حکومتوں کا کام ہے ،مگر الخدمت یہ کام کر رہی ہے ،جن اسپتالوں میںقیمتیں کم ہوتی ہیں وہاں علاج کا معیار نہیں ہوتا ۔کراچی کے عوام صحت کے شعبے میں مشکلات اٹھا رہے ہیں ، الخدمت لوگوں کو صحت کی معیاری سہولتیں ارزاں نرخوں پر فراہم کر رہی ہے،یہاں معیاری کواولیت دی جاتی ہے ۔

الخدمت کی شہر میں 20فارمیسیز میں ٹیمپریجز کنٹرولڈ ادویات ہیں ،ہمارے ہاں جعلی ادویات کی کڑی نگرانی کی جاتی ہے ،یہاں زائد المعیاد اور جعلی ادویات کا نام ونشان نہیں ۔پورے کراچی میں سب سے کم الخدمت کی فارمیسیز میں 15فیصد رعایت دی جاتی ہے۔ میڈیکل اسٹور یا فارمیسی میں فاما سسٹ کی دستیابی قانونی طور پر ضروری ہے مگر 80 سے 90فیصد فارمیسیز میں فارما سسٹ دستیاب نہیں ،ایک فارما سسٹ متبادل دو اکے بارے میںمریض اوران کے لواحقین کو صحیح طور پر گائیڈ کرسکتا ہے ۔

ہم عوام کی خدمت کررہے ہیں ۔فیڈرل بی ایریا کا کراچی کا اہم ترین علاقہ ہے،یہ اس شہر کے دل کی آواز ہے ۔اس فارمیسی اور کلینک سے علاقے کے مکین معیاری سہولتوں سے استفادہ کر سکیں گے ۔انہوں نے کہا کہ الخدمت صرف صحت کے شعبے میں کام نہیں کررہی یہ صاف پانی کے شعبے میں بھی کام کررہی ہے ، الخدمت شہر میں قائم اپنے 70واٹر فلٹریشن پلانٹ کے ذریعے پینے کا صاف پانی فراہم کر رہی ہے ،سیکڑوں سبمر سیبل پمپس لگائے گئے ،پورے ملک میں 32ہزار یتیم بچوں کی ان کے گھروں پر کفالت کی جارہی ہے ،آغوش ہوم میں بچوں کو معیاری رہائش وخوراک اور تعلیم دی جا رہی ہے ،بنو قابل کا پروگرام ملک بھر میں شروع ہو چکا ہے ،جس سے نوجوان اپنی زندگیاں بدل سکتے ہیں ۔

کراچی میں 55ہزار سے زائد بچے بنو قابل کورسز کرچکے ہیں اور سیکڑوں بچے اپنے خاندان کی کفالت کر رہے ہیں ،الخدمت عوام کی خدمت کرتی رہے گی۔امیر جماعت اسلامی ضلع گلبرگ کامران سراج نے کہا کہ ہم نے عوام کی خدمت کا وعدہ کیا تھا اور وہ خدمت ہم الخدمت کے تحت پورا کر رہے ہیں ۔ہمارا مقصد صرف اور صرف عام کی خدمت ہے ،یہ مستحن اقدام ہے الخدمت فارمیسی اور کلینک کے قیام سے علاقے کے لوگ بہترین میعار کی سہولتیں حاصل کرسکیں گے ۔