Live Updates

میرا شہر پی ٹی آئی، ٹھیکیدار اور بیورو کریٹس نے ملکر تباہ کیا، پیچھا نہیں چھوڑوں گا، خواجہ آصف

اتوار 31 اگست 2025 14:50

اسلام آباد (اُردو پوائنٹ اخبارتازہ ترین - این این آئی۔ 31 اگست2025ء)وزیر دفاع خواجہ آصف نے کہا ہے کہ میرا شہر (سیالکوٹ) پاکستان تحریک انصاف کی مقامی قیادت، ٹھیکیدار زیڈ کے بی اور چند بیورو کریٹس نے مل کر تباہ کر دیا، میں قبر تک ان کا پیچھا نہیں چھوڑوں گا۔سماجی رابطے کی ویب سائٹ ایکس پر ایک ویڈیو شیئر کرتے ہوئے اپنی پوسٹ میں خواجہ آصف نے لکھا کہ اس وڈیو کے ساتھ آواز پی ٹی آئی کے لیڈر عمر فاروق مائر کی ہے، اور یہ نشاندہی انہوں نے میرے خیال میں عبوری حکومت کے وقت کی تھی۔

وفاقی وزیر نے کہا کہ یہ وڈیو تازہ ہے، میری اس پروجیکٹ کے ڈائریکٹر سے بات ہوئی ہے، وہ میرے مؤقف اور پریشانی سے اتفاق کرتے ہیں۔خواجہ آصف نے پوسٹ میں تحریر کیا کہ پروجیکٹ پی ٹی آئی کی حکومت میں 2019 میں شروع ہوا تھا، اور بانی رکن پی ٹی آئی عمر فاروق مائر اسی وقت اس تباہی کی پیش گوئی کر رہے تھے اور انہوں نے ہی ڈار برادران کا نام لیا ہے۔

(جاری ہے)

خواجہ آصف نے کہا کہ زیڈ کے بی جو اس منصوبے کے ٹھیکیدار ہیں، وہ مشہور ٹھیکدار اور پارلیمنٹ کے ایوان بالا کی با اثر شخصیت ہیں۔وزیر دفاع نے بتایا کہ میرا ان سے تعارف 2013 میں ہوا تھا، جب میں وزیر پانی و بجلی تھا، زیڈ کے بی بلوچستان میں ایک ٹھیکہ لینے کے امیدوار تھے، وہ ایک علیحدہ کہانی ہے، جس میں سفارشی میرے چند ساتھی تھے۔انہوں نے کہا کہ میر ا شہر پی ٹی آئی کی مقامی قیادت، ٹھیکیدار زیڈ کے بی اور چند بیوروکریٹس نے مل کر تباہ کر دیا ہے، میں قبر تک ان کا پیچھا نہیں چھوڑوں گا۔وفاقی وزیر نے ایک اور تحریر نقل کرتے ہوئے لکھا کہ یہ سیلاب بھی یہودی ایجنٹ لگتا ہے انگریز کے بنائے 200 سال پرانے پل نہیں ٹورتا، اور ہمارے محب وطن ٹھیکیداروں کے پل بہا کر لے جاتا ہے۔