رواں سال کے دوران صوبہ بھر میں منشیات کے دھندے میں ملوث 35 ہزار سے زائد ملزمان گرفتار کئے گئے،ترجمان

اتوار 10 اگست 2025 19:20

لاہور (اُردو پوائنٹ اخبارتازہ ترین - اے پی پی۔ 10 اگست2025ء) انسپکٹر جنرل پولیس ڈاکٹر عثمان انور کی ہدایت پر ڈرگ فری پنجاب ویژن کی تکمیل میں پنجاب پولیس کے انسداد منشیات آپریشنز جاری ہیں۔ترجمان پنجاب پولیس نے بتایا کہ رواں سال کے دوران صوبہ بھر میں منشیات فروشوں کے ٹھکانوں پر 63 ہزار 612 چھاپے مارے گئے، منشیات کے دھندے میں ملوث 35 ہزار سے زائد ملزمان گرفتار کر کے مقدمات درج کئے گئے۔

(جاری ہے)

ملزمان کے قبضہ سے 20 ہزار 419 کلو گرام چرس، 1765 کلو گرام ہیروئن اور 1071 کلو گرام آئس برآمد ہوئی جبکہ 2333 کلو گرام افیون اور 04 لاکھ 89 ہزار 966 لٹر شراب بھی برآمد کی گئی۔ ترجمان کے مطابق صوبائی دارلحکومت لاہور میں 7 ہزار 204 منشیات فروشوں کو گرفتار کیا گیا اور ان کے قبضہ سے 3506 کلو گرام چرس، 308 کلو گرام ہیروئن، 580 کلو گرام آئس، 256 کلو گرام افیون اور 23 ہزار 137 لیٹر شراب بھی برآمد کی گئی۔آئی جی نے منشیات ڈیلرز اور سمگلرز کے خلاف سپیشل آپریشنز میں مزید تیزی کا حکم دیتے ہوئے کہا کہ سپلائی چین میں ملوث تمام ملزمان کو قانون کی گرفت میں لا کر سخت سزائیں دلوائی جائیں، تعلیمی اداروں اور ہاسٹلز کے گردونواح میں منشیات فروشی میں ملوث افراد کے خلاف کارروائیوں میں تیزی لائی جائے۔