علامہ اقبال اوپن یونیورسٹی کی فیکلٹی آف عریبک اینڈ اسلامک سٹڈیذ کا اجلاس

پیر 11 اگست 2025 20:22

اسلام آباد (اُردو پوائنٹ اخبارتازہ ترین - اے پی پی۔ 11 اگست2025ء) علامہ اقبال اوپن یونیورسٹی کی فیکلٹی آف عریبک اینڈ اسلامک سٹڈیز اور فیکلٹی آف سوشل سائنسز کا 74 واںاجلاس منعقد ہوا۔ صدارت ڈائریکٹر بورڈ پروفیسر ڈاکٹر ارشاد احمد ارشد نے کی جبکہ ڈینز، سینئر فیکلٹی ممبران، مختلف شعبہ جات کے سربراہان اور بیرونی ماہرین تعلیم نے بھرپور شرکت کی۔

شرکامیں راولپنڈی ویمن یونیورسٹی کی وائس چانسلر پروفیسر ڈاکٹر انیلہ کمال بھی شامل تھیں۔ اجلاس کے پہلے روز 16 پی ایچ ڈی سکالرز نے اپنے سائناپسز پیش کیے جبکہ مزید 16 سکالرز اپنے تحقیقی خاکے کل پیش کریں گے۔ ماہرین تعلیم نے علمی، تحقیقی اور فنی پہلوئوں پر سوالات کیے جن کے جوابات سکالرز نے وضاحت کے ساتھ دیئے۔فیکلٹی آف سوشل سائنسز کے ڈین پروفیسر ڈاکٹر عبدالعزیز ساحر نے سکالرز کو ہدایت کی کہ وہ اپنے سائناپسز کو فنی، فکری، ادبی اور موضوعاتی پہلوئوں سے مزید بہتر بنائیں تاکہ وہ اعلیٰ معیار پر پورا اتریں۔

(جاری ہے)

کئی سائنوپسز کو مفید تجاویز کے ساتھ نظرثانی کے لیے واپس کیا گیا جبکہ اکثریت کو فیکلٹی بورڈ نے منظور کر لیا۔یہ امر نہایت قابل توجہ ہے کہ وائس چانسلر پروفیسر ڈاکٹر ناصر محمود کی رہنمائی اور وژنری قیادت میں علامہ اقبال اوپن یونیورسٹی نے تحقیق کے معیار کو اپنی اولین ترجیح بناتے ہوئے اسے قومی ضروریات اور عالمی معیار کے عین مطابق بنانے کے لیے جامع اور موثر اقدامات کیے ہیں تاکہ یونیورسٹی کی تحقیقی کاوشیں علمی دنیا میں نمایاں مقام حاصل کر سکیں۔