عامرلیاقت کی غیراخلاقی تصویرکا کیس، یوٹیوبریاسرشامی کی بریت کی درخواست مسترد کرنے کے خلاف دائر اپیل منظور‘بری کرنے کا حکم

پیر 11 اگست 2025 22:07

کراچی(اُردو پوائنٹ اخبارتازہ ترین - آن لائن۔ 11 اگست2025ء)کراچی کی سٹی کورٹ میں ڈسٹرکٹ اینڈ سیشن جج شرقی کی عدالت نے معروف ٹی وی میزبان عامر لیاقت حسین کی غیر اخلاقی تصاویراورویڈیو وائرل کرنے کے مقدمے میں یوٹیوبر یاسر شامی کی بریت کی درخواست مسترد کرنے کے خلاف دائر اپیل منظور کرلی ہے اور انھیں بری کرنے کے احکاما ت جاری کردیے ہیں۔ ڈسٹرکٹ اینڈ سیشن جج شرقی، کراچی کی عدالت میں یوٹیوبر یاسر شامی کی بریت کی درخواست مسترد کرنے کے خلاف اپیل پر سماعت ہوئی، عدالت نے یاسر شامی کی درخواست منظور کرلی۔

درخواست گزار کے وکیل نے مؤقف اختیار کیا تھا کہ یاسر شامی کے خلاف شواہد موجود نہیں، وفاقی تحقیقاتی ادارے (ایف آئی ای) کی رپورٹ میں بھی یاسر شامی کے خلاف شواہد نہیں تھے۔

(جاری ہے)

وکیل نے عدالت کو آگاہ کیا کہ ایف آئی اے نے مقدمے کے ضمنی چالان میں یاسر شامی کے خلاف شواہد ناکافی قرار دیتے ہوئے کیس سے نام نکالنے کی رپورٹ جمع کرادی تھی۔جوڈیشل مجسٹریٹ نے ایف آئی اے کی رپورٹ اور بریت کی درخواست مسترد کر دی تھی۔

جوڈیشل مجسٹریٹ کے فیصلے کے خلاف سیشن عدالت سے رجوع کیا گیا تھا۔عامر لیاقت حسین کی نازیبا تصاویر وائرل کرنے کی شکایت عامر لیاقت کی بیٹی نے درج کرائی تھی۔خیال رہے کہ عامر لیاقت حسین جون 2022 میں اپنی رہائش گاہ پر بے ہوش پائے گئے تھے، جس کے بعد انہیں ہسپتال منتقل کیا گیا جہاں ان کی موت کی تصدیق ہوئی تھی۔اس سے قبل عامر لیاقت حسین شدید ذہنی دباو کا شکار تھے، انتقال سے چند ہفتے قبل ان کی سب سے آخری اہلیہ دانیہ ملک کے ہمراہ نامناسب ویڈیوز وائرل ہوئی تھیں۔

نامناسب ویڈیوز وائرل ہونے کے بعد عامر لیاقت حسین کا انتقال ہوا تھا اور ان کی موت کے چند ہفتوں بعد جولائی 2022 میں مرحوم کی سابق اور پہلی اہلیہ بشریٰ اقبال نے اپنے بیٹے اور بیٹی کے ہمراہ دانیہ ملک کے خلاف وفاقی تحقیقاتی ادارے کراچی میں کیس دائر کرنے کے لیے درخواست دی تھی۔بعد ازاں ایف آئی اے نے نازیبا ویڈیوز لیک کرنے کے الزامات کے تحت دانیہ شاہ کے خلاف پیکا ایکٹ2016 کی دفعہ20، 21، 24 کے تحت 10 اکتوبر 2022 کو مقدمہ درج کیا گیا تھا۔ایف آئی اے میں کیس دائر ہونے کے بعد دسمبر 2022 میں ایف ا?ئی اے نے پنجاب کے شہر لودھراں سے دانیہ ملک کو گرفتار کرلیا تھا، جسے بعد ازاں کراچی کی عدالت نے ضمانت پر رہا کردیا تھا۔