پاپ موسیقی کی کوئین گلوکارہ نازیہ حسن کو مداحوں سے بچھڑے 25 برس گزر گئے

بدھ 13 اگست 2025 15:21

کراچی(اُردو پوائنٹ اخبارتازہ ترین - این این آئی۔ 13 اگست2025ء)پاپ موسیقی کی کوئین عالمی شہرت یافتہ گلوکارہ نازیہ حسن کو مداحوں سے بچھڑے 25 برس گزر گئے۔ نازیہ حسن نہ صرف پاکستان بلکہ دنیا بھر میں موسیقی کے مداحوں کے دلوں میں زندہ ہیں۔ انہوں نے اپنے منفرد انداز اور خوبصورت آواز سے پاپ موسیقی کو پاکستان میں متعارف کروایا یہی وجہ ہے کہ انہیں پاکستان میں پاپ گلوکاری کی بانی بھی کہا جاتا ہے۔

ان کے گانے آج بھی مداحوں میں بیحد مقبول ہیں وہ صرف ایک گلوکارہ نہیں بلکہ نوجوان خواتین کی آئیکون تھیں، جنہوں نے خواتین کو موسیقی کی دنیا میں اپنی جگہ بنانے کا حوصلہ دیا۔ان کی یاد میں آج بھی ان کے چاہنے والے ان کے گانوں کو سنتے اور ان کی شخصیت کو یاد کرتے ہیں وہ نہ صرف پاکستان بلکہ پڑوسی ملک بھارت میں بھی بیحد مقبول ہوئیں۔

(جاری ہے)

نازیہ حسن 3 اپریل 1965 کوکراچی میں پیدا ہوئیں اور کم عمری میں ہی شہرت کی بلندیوں کو چھو لیا، صرف سترہ برس کی عمرمیں آپ جیسا کوئی سے شہرت کی بلندیوں پرپہنچی ڈسکو دیوانے سے لے کردل کی لگی تک ہرگانا ناظرین کے دلوں میں بسا۔

نازیہ حسن نے اپنے بھائی زوہیب حسن کے ساتھ مل کرپاکستانی موسیقی میں ایک نئی جہت متعارف کروائی،انکے گانے ڈسکو دیوانے،بوم بوم،آنکھیں ملانے والے مشہورہوئے جبکہ انگریزی زبان میں ڈریمر دیوانے نے دھوم مچائی،دنیا بھر میں ان کے ساڑھے چھ کروڑ ریکارڈز فروخت ہوئے۔ورسٹائل گلوکارہ نے پرائیڈ آف پرفارمنس، بیسٹ فی میل ،پلے بیک سنگرسمیت متعدد ایوارڈز اپنے نام کئے،کینسر سے طویل جنگ کے بعد نازیہ حسن 13 اگست 2000 میں دنیا سے رخصت ہوگئیں۔