گلیات اور کاغان ڈویلپمنٹ اتھارٹیز کو جدید ملٹی پرپز مشینری کی فراہمی

پیر 11 اگست 2025 22:14

پشاور (اُردو پوائنٹ اخبارتازہ ترین - اے پی پی۔ 11 اگست2025ء) خیبر پختونخوا حکومت نے سیاحتی علاقوں میں ایمرجنسی رسپانس کو بہتر بنانے کے لئے ایک اہم اقدام کے طور پر گلیات ڈویلپمنٹ اتھارٹی اور کاغان ڈویلپمنٹ اتھارٹی کو جدید ملٹی پرپز مشینری فراہم کر دی ہے۔وزیر اعلیٰ ہاوس پشاور تر جمان کے مطابق وزیر اعلیٰ خیبر پختونخوا علی امین خان گنڈاپور نے پیر کو وزیر اعلیٰ ہاوس پشاور میں منعقدہ ایک تقریب میں یہ جدید مشینیں باضابطہ طور پر گلیات ڈویلپمنٹ اتھارٹی اور کاغان ڈویلپمنٹ اتھارٹی کے حکام کو حوالہ کی۔

وزیر اعلیٰ کو بریفنگ دیتے ہوئے بتایا گیا کہ یہ کثیر المقاصد مشینیں ملک میں اپنی نوعیت کی پہلی مشینیں ہیں جن کی مدد سے برفباری کے موسم میں سڑکوں کو ہمہ وقت کھلا رکھنے میں مدد ملے گی۔

(جاری ہے)

یہ ہائی پرفارمنس مشینیں مشکل اور سخت موسمی حالات میں بھی تیز اور موثر کام کرنے کی صلاحیت رکھتی ہیں۔ مزید برآں ، یہ مشینیں سڑک سے برف اور گلیشئیرز کو تیزی سے ہٹانے کے ساتھ ساتھ گرے ہوئے درخت، کنکریٹ کے ملبے، لوہے کی رکاوٹوں کو کاٹنے سمیت سات مختلف کام کرنے کی صلاحیت رکھتی ہیں۔

یہ جدید مشینیں عالمی بینک کی معاونت سے چلنے والے کائٹ پروگرام کے تحت خریدی گئی ہیں جبکہ اس طرح کی مزید چار مشینوں کی خریداری کا عمل بھی جاری ہے۔ وزیر اعلیٰ نے اس موقع پر گفتگو کرتے ہوئے کہا کہ صوبائی حکومت شراکت دار اداروں کے تعاون سے سیاحتی مقامات کو مزید محفوظ، قابلِ رسائی اور سیاحوں کے لیے پرکشش بنانے کے لیے عملی اقدامات کر رہی ہے۔

ان جدید مشینوں کی دستیابی سے سردیوں کے موسم میں بھی سیاحتی علاقوں تک سیاحوں کی آسان رسائی کو ممکن بنایا جاسکے گا۔ وزیر اعلیٰ نے مزید کہا کہ ان مشینوں کی مدد سے کسی بھی ہنگامی صورتحال میں سیاحوں اور مقامی لوگوں کی جانیں محفوظ بنائی جاسکیں گی اس سلسلے میں تعاون فراہم کرنے پر عالمی بینک کا شکریہ ادا کرتے ہیں۔ وزیر اعلیٰ کا کہنا تھا کہ سیاحوں کی حفاظت اور سیاحتی علاقوں تک ہمہ وقت رسائی سیاحت کے فروغ کے لئے انتہائی ضروری ہے۔

موجودہ صوبائی حکومت  سیاحتی سرگرمیوں کو پورا سال جاری رکھنے کے لئے اقدامات کرر ہی ہے، سیاحتی علاقوں تک رابطہ سڑکوں کی تعمیر اور سڑکوں کے بنیادی ڈھانچے میں بہتری پر کام کرر ہے ہیں، اینٹگریٹڈ ٹوارزم زونز کے قیام اور نئے سیاحتی مقامات کی ترقی پر بھی پیشرفت جاری ہے۔ میزبان ہوم اسٹے ٹورازم موجودہ صوبائی حکومت کا ایک منفرد منصوبہ ہے،  اس منصوبے سے سیاحوں کو قیام کے لئے بہترین ماحول کی فراہمی کے ساتھ ساتھ مقامی لوگوں کو روزگار کے مواقع میسر آئیں گے۔

ایمرجنسی رسپانس اور سیاحتی انفراسٹرکچر کے شعبوں میں یہ اقدامات اور سرمایہ کاری ایک بڑے وژن کا حصہ ہیں، ان اقدامات سے صوبے میں سیاحت کے شعبے کو پائیدار بنیادوں پر ترقی دے کر صوبے کی معیشت کو مضبوط بنایا جاسکے گا۔ متعلقہ صوبائی کابینہ اراکین کے علاوہ محکمہ سیاحت، گلیات ڈیویلپمنٹ اتھارٹی اور کاغان ڈیویلپمنٹ اتھارٹی کے حکام بھی تقریب میں شریک ہوئے۔