مجھے طلبہ وطالبات کا مستقبل بہت عزیز،انہیں معیاری تعلیم کی فراہمی میں کسی قسم کی کوتاہی برداشت نہیں کی جائے گی،گورنر بلوچستان

کوئٹہ (اُردو پوائنٹ اخبارتازہ ترین - اے پی پی۔ 12 اگست2025ء) گورنر بلوچستان جعفرخان مندوخیل نے کہا کہ موثر گورننس، ریسورس منیجمنٹ اور فیصلہ سازی کے عمل کے اعتبار سے ایک اچھے ایڈمنسٹریٹر کا یونیورسٹی کو ترقی اور کامیابی کی راہ پر گامزن کرنے میں کلیدی کردار ہے، مجھے تمام پبلک سیکٹر یونیورسٹیز میں زیر تعلیم طلبہ وطالبات کا مستقبل بہت عزیز ہے لہٰذا اس سلسلے میں کسی قسم کی کوتاہی اور غفلت برداشت نہیں کی جائیگی۔

ان خیالات کا اظہار انہوں نے لسبیلہ یوبیورسٹی آف ایگریکلچر، واٹر اینڈ میرین سائنسز کے آٹھویں سینیٹ اجلاس کی صدارت کرتے ہوئے کیا۔ اس موقع پر گورنر جعفرخان مندوخیل نے کہا کہ یونیورسٹی کا ذمہ دار شخص ایک ٹیم ورک کے جذبہ کے تحت لسبیلہ یوبیورسٹی کے مشترکہ اہداف کے حصول کی خاطر پوری تندہی سے کام کرے،انہوں نے وائس چانسلر ڈاکٹر عبدالمالک ترین اور ان کی پوری ٹیم کی کارکردگی کو سراہتے ہوئے کہا کہ وہ یونیورسٹی کے نام کو مزید روشن کرنے کیلئے اپنی کوششیں تیز کر دیں اور تعلیمی سرگرمیوں کی باریک بینی سے نگرانی بھی کریں جس میں تدریسی طریقوں کے نصاب کی مطابقت اور طلبہ کے سیکھنے کے نتائج کا باقاعدہ جائزہ شامل ہیں۔

(جاری ہے)

انہوں نے کہا کہ یونیورسٹی کے مالی معاملات میں شفافیت ضروری ہے، متعلقہ ذمہ داران کی جوابدہی اور اعتماد کو یقینی بنانے کیلئے باقاعدہ بیرونی آڈٹ کروائیں جس سے ہمیں باخبر فیصلے کرنے اور وسائل کو موثر طریقے سے مختص کرنے میں مدد ملے گی، یونیورسٹی کے ذرائع آمدن بڑھانے اور اضافی اخراجات کم کرنے کیلئے ضروری ہے کہ یونیورسٹی کی زمینوں پر پھل دار درخت کاشت کریں تاکہ آمدنی کے نئے ذرائع پیدا ہوں اور بیرونی فنڈنگ پر انحصار کم ہو، اس سے زیر تعلیم طلباو طالبات کو تحقیق اور تربیت کے مواقع بھی ملیں گے۔

گورنر مندوخیل نے خصوصی ہدایت دی کہ تعیناتیوں اور پروموشن میں میرٹ کا خاص خیال رکھیں کیونکہ یونیورسٹی کا سٹاف ممبر اپنی اہلیت اور حق کی بنیاد پر مساوی مواقع کا مستحق ہے۔ لسبیلہ یوبیورسٹی کے آٹھویں سینیٹ اجلاس میں شرکاءکی تجاویز اور سفارشات کے نتیجے میں کئی اہم فیصلے کئے گئے۔