پی ڈی پی اور ماڈل ویلیج کا دائرہ کاروسیع کریں گے‘ وزیربلدیات

وزیراعلی مریم نواز بیک وقت شہروں اور دیہات کی ترقی پر فوکس کررہی ہیں پنجاب حکومت شہروں، دیہات میں سینی ٹیشن، ڈرین اورپختہ گلیوں کی سکیمیں مکمل کریگی‘ ذیشان رفیق

بدھ 13 اگست 2025 13:49

پی ڈی پی اور ماڈل ویلیج کا دائرہ کاروسیع کریں گے‘ وزیربلدیات

لاہور (اُردو پوائنٹ اخبارتازہ ترین - این این آئی۔ 13 اگست2025ء) وزیر بلدیات پنجاب ذیشان رفیق نے کہا ہے کہ وزیراعلیٰ مریم نواز بیک وقت شہروں اور دیہات کی ترقی پر فوکس کر رہی ہیں، اس تناظر میں پنجاب ڈویلپمنٹ پروگرام (پی ڈی پی) اور ماڈل ویلیج کا دائرہ کار بتدریج وسیع کیا جائے گا۔ وہ سول سیکرٹریٹ میں ہونے والے ایک اجلاس کی صدارت کر رہے تھے جس میں ایڈیشنل سیکرٹری احمر کیفی نے بھی شرکت کی۔

پنجاب میونسپل ڈویلپمنٹ فنڈ کمپنی (پی ایم ڈی ایف سی) کے ایم ڈی سید زاہد عزیز نے پی ڈی پی جبکہ پنجاب رورل میونسپل ڈویلپمنٹ کمپنی کے سی ای او اسداللہ نے مثالی گائوں پروگرام پر بریفنگ دی۔ اس موقع پر وزیراعلی کے مثالی گائوں پروگرام کو آگے بڑھانے کی مختلف تجاویز پر غور کیا گیا۔

(جاری ہے)

وزیر بلدیات ذیشان رفیق نے کہا کہ پنجاب حکومت دونوں منصوبوں کے تحت شہروں اور دیہات میں سینی ٹیشن، ڈرین اور پختہ گلیوں کی سکیمیں مکمل کرے گی۔

ان سہولیات کی فراہمی سے شہریوں کو معیار زندگی بلند ہوگا۔ ستھرا پنجاب پروگرام کے تحت ہر گائوں میں صفائی کی سہولت پہلے سے دستیاب ہے۔ وزیر بلدیات نے کہا کہ یونین کونسلز کا بنیادی شہری خدمات کی فراہمی میں بنیادی کردار ہے۔ پنجاب بھر کی یونین کونسلوں کو خدمت مراکز میں تبدیل کیا جائے گا تاکہ لوگوں کو ان کے گھروں کے قریب ضروری خدمات مل سکیں۔

ذیشان رفیق نے کہا کہ وزیراعلی مریم نواز شریف کی خصوصی ہدایات پر پنجاب بھر میں برتھ اور ڈیتھ سر ٹیفکیٹ کی سہولت پہلے سے زیادہ آسانی سے میسر ہے۔ شہری گھر بیٹھے ایپ کے ذریعے سر ٹیفکیٹ حاصل کر سکتے ہیں۔ صوبائی وزیر نے دونوں منصوبوں کے لئے جامع ماسٹر پلان بنانے کی ہدایت کرتے ہوئے کہا کہ وزیراعلی کے ویژن کے مطابق شفافیت اور معیار دونوں کا ہر صورت میں خیال رکھا جائے۔