قومی ترقی کے لیے قومی وسائل کے شفاف استعمال کو یقینی بنایا جائے گا‘شیر علی گورچانی

یومِ آزادی قربانیوں کی عظیم داستان ہے، بے شمار قربانیوں کے بعد ہمیں ایک آزاد ریاست کا عظیم تحفہ نصیب ہوا

جمعرات 14 اگست 2025 17:25

لاہور (اُردو پوائنٹ اخبارتازہ ترین - این این آئی۔ 14 اگست2025ء)صوبائی وزیر معدنیات پنجاب شیر علی گورچانی نے پوری قوم کو یوم آزادی کی دلی مبارکباد پیش کرتے ہوئے کہا ہے کہ 14 اگست ہماری قومی تاریخ کا وہ درخشاں دن ہے جب بے شمار قربانیوں کے بعد ہمیں ایک آزاد ریاست کا عظیم تحفہ نصیب ہوا۔انہوں نے اپنے پیغام میں کہا کہ یہ دن ہمیں اس عزم کی یاد دہانی کرواتا ہے کہ آزادی کوئی عطیہ نہیں بلکہ ایک طویل، صبر آزما اور ناقابلِ فراموش جدوجہد کا نتیجہ ہے، جس کے پیچھے بانی پاکستان قائداعظم محمد علی جناحؒ اور لاکھوں جانثاروں کی قربانیاں کارفرما ہیں۔

(جاری ہے)

وزیر معدنیات نے کہا کہ آج کا دن ہمیں تجدیدِ عہد کا پیغام دیتا ہے کہ ہم ملک کو امن، ترقی، خوشحالی اور خود انحصاری کی راہ پر گامزن رکھنے کے لیے اپنی بھرپور توانائیاں صرف کریں گے۔انہوں نے اس عزم کا اعادہ کیا کہ محکمہ معدنیات پنجاب صوبے میں موجود قدرتی وسائل کو شفاف، پائیدار اور عوامی مفاد میں بروئے کار لانے کے لیے ہر ممکن اقدامات کر رہا ہے تاکہ یہ قیمتی دولت ملک کی معاشی تعمیر میں مؤثر کردار ادا کر سکے۔آخر میں وزیر معدنیات نے اپنے پیغام میں کہا کہ پاکستان ہمارا فخر ہے، اس کی حفاظت، ترقی اور وقار کے لیے ہم سب کو مل کر کام کرنا ہوگا۔