Live Updates

مانسہرہ ، سیلابی صورتحال کے باعث لینڈ سلائیڈنگ واقعات میں اضافہ ، سیاحوں کو مشکلات کا سامنا

جمعہ 15 اگست 2025 13:30

مانسہرہ (اُردو پوائنٹ اخبارتازہ ترین - اے پی پی۔ 15 اگست2025ء) ضلع مانسہرہ میں مسلسل جاری بارشوں کے باعث مختلف علاقوں میں ندی نالوں اور دریاوں میں سیلابی صورتحال اور لینڈ سلائیڈنگ کے واقعات پیش آ رہے ہیں جس سے شہریوں اور سیاحوں کو مشکلات کا سامنا ہے۔ اس صورتحال میں مانسہرہ پولیس ہر محاذ پر عوام کی مدد اور جان و مال کے تحفظ کیلئے سرگرم عمل ہے۔

(جاری ہے)

گذشتہ روز سے جاری بارش کے باعث مختلف مقامات پر محصور ہونے والے سینکڑوں سیاحوں اور لوکل عوام کو مانسہرہ پولیس نے بروقت ریسکیو کرتے ہوئے محفوظ مقامات پر منتقل کیا اور ان کی ہر ممکن دیکھ بھال کے بعد انہیں بحفاظت گھروں کو روانہ کیا۔ تمام پولیس افسران اور جوان فیلڈ میں موجود ہیں اور کسی بھی ہنگامی صورتحال میں فوری امداد فراہم کر رہے ہیں۔

ڈسٹرکٹ پولیس آفیسر مانسہرہ شفیع اﷲ گنڈا پور نے تمام پولیس فورس کو ہمہ وقت الرٹ رہنے کی ہدایات جاری کی ہیں، بالائی علاقوں میں پولیس کی اضافی نفری تعینات کر دی گئی ہے تاکہ بروقت ریسکیو، ٹریفک کنٹرول اور امدادی سرگرمیوں کو یقینی بنایا جا سکے۔ عوام سے گذارش ہے کہ غیر ضروری سفر سے گریز کریں اور کسی بھی ایمرجنسی یا مدد کی ضرورت کی صورت میں مانسہرہ پولیس کنٹرول روم نمبر 0997920110 پر فوری رابطہ کریں۔