پاور ڈویژن ، تمام صنعتی اور اقتصادی زونز میں بجلی کی فراہمی، بلنگ سے متعلق فوری اقدامات کے احکامات

جمعہ 15 اگست 2025 18:43

اسلام آباد (اُردو پوائنٹ اخبارتازہ ترین - اے پی پی۔ 15 اگست2025ء) پاور ڈویژن نے تمام صنعتی اور سپیشل اکنامک زونز کیلئے ایک پوائنٹ پر ہی بجلی کی فراہمی میں بڑی پیش رفت کے تحت تمام صنعتی اور اقتصادی زونز میں بجلی کی فراہمی، بلنگ سے متعلق فوری اقدامات کے احکامات جاری کئے ہیں۔ پاور ڈویژن کے مطابق وفاقی وزیر سردار اویس احمد خان لغاری نے نیپرا کے فیصلے کے مطابق بجلی کی تقسیم کار کمپنیوں کو ان زونز کی انتظامیہ کے ساتھ فوری رابطہ کرنے کے احکامات جاری کئے ہیں۔

واضح رہے کہ پاور ڈویژن نے کابینہ کی منظوری کے بعد 25 فروری کو نیپرا میں ان زونز کو ایک پوائنٹ پر بجلی فراہمی سے متعلق درخواست دی تھی۔ نیپرا نے مشاورت کے بعد 11 اگست کو ان زونز کے ساتھ گفت و شنید کی بنیاد پر حتمی معاہدے کرنے کی ہدایت کی تھی۔

(جاری ہے)

وفاقی وزیر پاور ڈویژن سردار اویس لغاری نے بجلی کی تمام تقسیم کار کمپنیوں کو سپیشل اکنامک زونز اور انڈسٹریل اسٹیٹس کے ساتھ اس حوالہ سے فوری عمل درآمد کی ہدایات کی ہے۔

انہوں نے تمام کمپنیوں کو نیپرا کی ہدایات کے مطابق فوری معاہدوں کو حتمی شکل دینے کے احکامات بھی جاری کئے ہیں۔ واضح رہے کہ بجلی کی تقسیم کار کمپنیاں اب فوری طور معاہدوں کی روشنی میں ان زونز کو ایک پوائنٹ پر بجلی فراہم کریں گی جس سے بجلی کی تقسیم کار کمپنیوں کی بے جا مداخلت اور کرپشن کا تدارک بھی کیا جا سکے گا۔