نینوٹیکنالوجی پرپہلی عالمی کانگریس پیر سے آئی سی سی بی ایس میں شروع ہوگی

تقریبا6 سوملکی و غیر ملکی ماہرین شرکت کرینگے، پروفیسر رضا شاہ کا جامعہ کراچی میں اجلاس سے خطاب

ہفتہ 16 اگست 2025 17:40

کراچی (اُردو پوائنٹ اخبارتازہ ترین - این این آئی۔ 16 اگست2025ء)کراچی نینوسائنس اور نینوٹیکنالوجی کے موضوع پر پہلی تین روزہ بین الاقوامی کانگریس (آئی سی این این)پیر 18تا20اگست سے بین الاقوامی مرکز برائے کیمیائی و حیاتیاتی علوم (آئی سی سی بی ایس)، جامعہ کراچی میں شروع ہوگی، سیکریٹری صحت حکومت سندھ ریحان اقبال بلوچ اس بین الاقوامی کانگریس کا افتتاح کریں گی،اس ہائبرڈ عالمی کانفرنس میں 6سو سے زائد ملکی و غیر ملکی سائنسدان شرکت کریں گے۔

یہ بات آئی سی سی بی ایس کے ڈائریکٹر پروفیسر ڈاکٹر محمد رضا شاہ نے ہفتے کو ایک اجلاس کی صدارت کرتے ہوئے کہی۔ اجلاس میں عالمی سائنس کانگریس کے انتظامات کا جائزہ لیا گیا۔ انہوں نے کہا کہ اس کانگریس کا مقصد نانوٹیکنالوجی سے متعلق تحقیق کے شعبے میں دنیا بھر کے ماہرین کو ایک پلیٹ فارم پر اکٹھا کرنا اور بنی نوع انسان کے مشترکہ مفاد کے لیے عالمی تحقیقی شراکت داری کو فروغ دینا ہے۔

(جاری ہے)

انہوں نے زور دیا کہ یہ کانفرنس ملکی و غیر ملکی سائنسدانوں اور محققین کے درمیان بھرپور تبادلہ خیال کا موقع فراہم کرے گی اور مختلف خطوں کے سائنسدانوں کے درمیان تعاون کو مزید مضبوط بنانے کی توقع ہے۔اجلاس میں یہ بھی بتایا گیا کہ افتتاحی تقریب پیر کو صبح10بجے آئی سی سی بی ایس کے پروفیسر سلیم الزمان صدیقی آڈیٹوریم میں منعقد ہوگی۔، سیکریٹری صحت حکومت سندھ ریحان اقبال بلوچ افتتاحی خطاب کریں گی جس کے بعد مہمانِ خصوصی شیخ الجامعہ کراچی پروفیسر ڈاکٹر خالد محمود عراقی، پروفیسر ایمریٹس و سابق وفاقی وزیر برائے سائنس و ٹیکنالوجی پروفیسر ڈاکٹر عطاالرحمن، آئی سی سی بی ایس کے ڈائریکٹر پروفیسر ڈاکٹر محمد رضا شاہ، او آئی سی کومسٹیک کے کوآرڈینیٹر جنرل پروفیسر ڈاکٹر ایم اقبال چوہدری، چیئرپرسن ڈاکٹر پنجوانی میموریل ٹرسٹ محترمہ نادرہ پنجوانی، حسین ابراہیم جمال فانڈیشن کے چیئرمین جناب عزیز لطیف جمال اور ڈاکٹر دلشاد حسین خطاب کریں گے۔