امیرالدین میڈیکل کالج انتظامیہ کی وزیر اعلی مریم نواز سے کالج کیلئے جگہ الاٹ کرنے کی اپیل

ہفتہ 16 اگست 2025 18:32

لاہور (اُردو پوائنٹ اخبارتازہ ترین - اے پی پی۔ 16 اگست2025ء) پوسٹ گریجویٹ میڈیکل انسٹیٹیوٹ امیرالدین میڈیکل کالج اور لاہور جنرل ہسپتال کے بورڈ آف مینجمنٹ نے متفقہ طور پر وزیر اعلی پنجاب مریم نوازسے اپیل کی ہے کہ امیرالدین میڈیکل کالج کی مستقل عمارت کی تعمیر کے لیے فوری طور پر موزوں جگہ مختص کی جائے تاکہ طلبہ کو معیاری تعلیمی ماحول اور جدید سہولیات فراہم کی جا سکیں۔

پرنسپل امیرالدین میڈیکل کالج پروفیسر ڈاکٹر فاروق افضل نے بتایا کہ بورڈ آف مینجمنٹ نے محکمہ سپیشلائزڈ ہیلتھ کیئر اینڈ میڈیکل ایجوکیشن کو باضابطہ درخواست جمع کروائی ہے جس میں کالج کی علیحدہ عمارت، طلبہ کے لیے ہاسٹلز اور جدید تدریسی سہولیات کی فراہمی کو وقت کی اہم ضرورت قرار دیا گیا ہے۔

(جاری ہے)

انہوں نے کہا کہ 2012 میں قیام کے بعد سے امیرالدین میڈیکل کالج تاحال پوسٹ گریجویٹ میڈیکل انسٹیٹیوٹ کی محدود عمارت میں کام کر رہا ہے، جہاں نہ صرف جدید لیبارٹریز اور لیکچر ہالز کی کمی ہے بلکہ ہاسٹلز اور غیر نصابی سرگرمیوں کے لیے بھی بنیادی سہولتیں دستیاب نہیں ہیں، اس صورتحال کے باعث طلبہ کو تعلیمی و تحقیقی معیار پر سمجھوتہ کرنا پڑ رہا ہے، جو پی ایم ڈی سی اور بین الاقوامی اداروں کے معیار کے مطابق نہیں۔

میڈیکل ٹیچرز و سٹوڈنٹس نے پنجاب حکومت سے اپیل کی کہ امیرالدین میڈیکل کالج کو فیروز پور روڈ کے قریب کم از کم 400 کنال اراضی فراہم کی جائے تاکہ جدید عمارت، لیبارٹریز، ہاسٹلز اور ریسرچ سینٹرز تعمیر کیے جا سکیں۔ انہوں نے کہا کہ یہ اقدام نہ صرف میڈیکل ایجوکیشن کے معیار کو بلند کرے گا بلکہ صوبے میں صحت کے شعبے کی بہتری اور معیاری افرادی قوت کی تیاری میں بھی سنگ میل ثابت ہوگا۔