اعلی ثانوی تعلیمی بورڈ کراچی نے انٹرمیڈیٹ پری انجینئرنگ گروپ کے نتائج کا اعلان کردیا

کراچی (اُردو پوائنٹ اخبارتازہ ترین - اے پی پی۔ 16 اگست2025ء) اعلی ثانوی تعلیمی بورڈ کراچی نے انٹرمیڈیٹ بارہویں جماعت سائنس پری انجینئرنگ گروپ کے سالانہ امتحانات برائے 2025 کے نتائج کا اعلان کردیا ہے۔ہفتہ کو جاری اعلامیہ کے مطابق چیئرمین انٹربورڈ کراچی فقیر محمد لاکھو نے نتائج کا اعلان کرتے ہوئے بتایا کہ سائنس پری انجینئرنگ گروپ کے امتحانات میں تینوں پہلی پوزیشنز طالبات نے حاصل کیں جبکہ پہلی پوزیشن مشترکہ طور پر دو طالبات نے حاصل کی۔

انہوں نے کہا کہ سائنس پری انجینئرنگ گروپ کے امتحانات میں پہلی پوزیشن مشترکہ طورپر عثمان پبلک اسکول کیمپس ون کی طالبہ لائبہ انصاری بنت محمد عاصم عبدالعزیز رول نمبر 219251اور بی اے ایم ایم پی ای سی ایچ ایس گورنمنٹ کالج فار ویمن کی طالبہ سیدہ عنزیلہ حیدر زیدی بنت سید عقیل حیدر زیدی رول نمبر 221331 نے ٹوٹل 1100میں سے 1019نمبرز اے ون گریڈ کے ساتھ حاصل کی۔

(جاری ہے)

انہوں نے کہا کہ ان امتحانات میں بی اے ایم ایم پی ای سی ایچ ایس گورنمنٹ کالج فار ویمن کی طالبہ آئزل مرحا بنت زبیر عارف رول نمبر 221211نے 1014نمبرز اے ون گریڈ کے ساتھ دوسری پوزیشن جبکہ ہمدرد انٹرمیڈیٹ کالج فار سائنس اینڈ کامرس بلاک ایچ نارتھ ناظم آباد کی طالبہ حفصہ عمران بنت عمران رول نمبر 219422 نے 1010 نمبرز اے ون گریڈ کے ساتھ تیسری پوزیشن حاصل کی۔

ناظم امتحانات زرینہ راشد نے نتائج کی تفصیلات بتاتے ہوئے کہا کہ سائنس پری انجینئرنگ گروپ کے امتحانات میں 21ہزار 617 امیدوارو ں نے رجسٹریشن حاصل کی جبکہ 21ہزار 19 امیدوار امتحانات میں شریک ہوئے جس میں سے 11ہزار 547 امیدوار کامیاب قرار پائے اس طرح کامیابی کا تناسب 54.94%فیصد رہا۔انہوں نے کہا کہ ان امتحانات میں 1035امیدوار اے ون گریڈ، 1762اے گریڈ، 2351بی گریڈ، 2938سی گریڈ، 3124ڈی گریڈ، 296ای گریڈمیں کامیاب قرار پائے جبکہ41امیدوار پاس ہوئے۔

انہوں نے کہا کہ نتائج بورڈ کی ویب سائٹ www.biek.edu.pkپر اپ لوڈ کردیئے گئے ہیں۔ امیدوا ر اپنے نتائج اعلی ثانوی تعلیمی بورڈ کراچی کی آفیشل اینڈرائڈ ایپ پر بھی دیکھ سکتے ہیں۔ اینڈرائڈ ایپ کو گوگل پلے اسٹور پر BIEK کے نام سے سرچ کر کے موبائل میں انسٹال کیا جاسکتا ہے۔ چیئرمین فقیر محمد لاکھو نے کامیاب ہونے والی طالبات کو مبارکباد دیتے ہوئے کہا ہے کہ انٹرمیڈیٹ کے تمام گروپس کے نتائج کے اعلان کے بعد پوزیشن ہولڈرز طلبہ کی حوصلہ افزائی کیلئے ان کے اعزاز میں تقریب منعقد کی جائے گی جس میں طلبہ کے ساتھ والدین، اساتذہ اور میڈیا کو بھی مدعو کیا جائے گا۔