Live Updates

پی ٹی اے کی جانب سے سیلاب متاثرہ علاقوں میں ٹیلی کام سروسز کی بحالی کے اقدامات جاری

ہفتہ 16 اگست 2025 22:50

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) پاکستان ٹیلی کمیونیکیشن اتھارٹی (پی ٹی اے) خیبر پختونخوا اور ملک کے دیگر سیلاب زدہ علاقوں میں ٹیلی کام صورتحال کے حوالے سے نگرانی کا سلسلہ جاری رکھے ہوئے ہیں۔ حالیہ سیلاب سے متعدد موبائل اور فکسڈ لائن سائٹس متاثر ہوئی ہیں جس کے باعث سروسز میں تعطل پیدا ہوا ہے۔

(جاری ہے)

ہفتہ کو پی ٹی اے کی جانب سے جاری بیان کے مطابق پی ٹی اے کی ٹیمیں متاثرہ علاقوں میں موجود ہیں اور وفاقی و صوبائی اداروں، ضلعی انتظامیہ اور ٹیلی کام آپریٹروں کے ساتھ رابطے میں ہیں تاکہ سروسز کے حوالے سے فوری بحالی کا عمل یقینی بنایا جا سکے۔

بونیر میں پی ٹی اے نے وفاقی وزیر امیر مقام، چیئرمین پی ٹی آئی گوہر خان، ڈپٹی کمشنر بونیر کاشف قیوم اور پی ٹی سی ایل و سی ایم اوز کے اعلیٰ نمائندگان کے ساتھ نیٹ ورک کی بحالی کے اقدامات کے جائزے کے لئے اجلاس منعقد کیا۔واضح رہے کہ پی ٹی اے کی جانب سے ٹیلی کام آپریٹروں کے تعاون سے کم سے کم وقت میں کمیونیکیشن سروسز کی بحالی کے حوالے سے بھرپور اقدامات کئے جا رہے ہیں تاکہ بلا تعطل ٹیلی کام خدمات ،ریسکیو اور ریلیف آپریشنز کے حوالے سے بروقت اقدامات اٹھائے جا سکیں۔