صحافی خاور حسین کی موت کی تحقیقات کیلئے فیکٹ فائنڈنگ کمیٹی اور میڈیکل بورڈ تشکیل

وزیراعلیٰ سندھ کے نوٹس کے بعد فرانزک ٹیم سانگھڑ پہنچ گئی، مزید قانونی کارروائی کیلئے لاش کا پوسٹ مارٹم کیا جائے گا

ساجد علی پیر 18 اگست 2025 11:25

صحافی خاور حسین کی موت کی تحقیقات کیلئے فیکٹ فائنڈنگ کمیٹی اور میڈیکل ..

کراچی ( اُردو پوائنٹ اخبارتازہ ترین۔ 18 اگست 2025ء ) سندھ حکومت نے صحافی خاور حسین کی پر اسرار موت کی تحقیقات کے لیے میڈیکل بورڈ اور فیکٹ فائنڈنگ کمیٹی تشکیل دے دی گئی، صوبائی وزیر داخلہ ضیاء الحسن لنجار نے بتایا کہ ورثاء اور صحافیوں کی درخواست پر میڈیکل بورڈ تشکیل دے رہے ہیں جس میں سینئر ڈاکٹراور فارنزک ماہرین شامل ہیں، میڈیکل بورڈ آج ہی خاور حسین میت کا معائنہ کرے گا۔

میڈیا رپورٹس کے مطابق صحافی خاور حسین کی موت کی تحقیقات کے لیے فیکٹ فائنڈنگ کمیٹی بھی تشکیل دے دی گئی ہے، پولیس کی جانب سے واقعے کی تحقیقات کے لیے بنائی جانے والی فیکٹ فائنڈنگ کمیٹی ایڈیشنل آئی جی سی ٹی ڈی آزاد خان کی سربراہی میں کام کرے گی، جس میں ڈی آئی جی ویسٹ عرفان بلوچ، ایس ایس پی سانگھڑ عابد بلوچ شامل ہیں، کمیٹی 2 روز کے اندر رپورٹ مکمل کرکے آئی جی سندھ کو بھیجے گی اور خاور حسین کی موت کےحوالے سے تحقیقات کرے گی۔

(جاری ہے)

بتایا گیا ہے کہ وزیر اعلیٰ سندھ مراد علی شاہ کے نوٹس کے بعد شہید بینظیرآباد سے فرانزک ٹیم سانگھڑ پہنچ گئی، فرانزک ٹیم کے اہلکار واقعے کا تمام پہلوؤں سے تفصیلی جائزہ لے رہے ہیں، ڈی آئی جی شہید بے نظیر آباد فیصل بشیر میمن نے بتایا کہ جائے وقوعہ سے مزید شواہد جمع کیے جارہے ہیں، ابھی یہ کہنا قبل از وقت ہوگا کہ واقعہ کس طرح پیش آیا، پولیس ٹیم ہر پہلو سے تفتیش کررہی ہے، اطراف کے علاقے سے سی سی ٹی وی فوٹیجز حاصل کی جارہی ہیں، گاڑی سے ملنے والے اسلحہ کو فارنزک لیب بھیجا جارہا ہے، مزید قانونی کارروائی کیلئے صحافی خاور حسین کی لاش کا پوسٹ مارٹم کیا جائے گا۔