حمیرا اصغر کیس میں اہم پیشرفت، عدالت کا پولیس کو قتل کا مقدمہ درج کرنے کا حکم

اداکارہ کے اہل خانہ کے بیانات قلمبند کرنے کی ہدایت، پولیس 154 کے تحت مقدمہ درج کرنے کی پابند ہے؛ عدالتی فیصلہ

ساجد علی پیر 18 اگست 2025 17:11

حمیرا اصغر کیس میں اہم پیشرفت، عدالت کا پولیس کو قتل کا مقدمہ درج کرنے ..

کراچی ( اُردو پوائنٹ اخبارتازہ ترین۔ 18 اگست 2025ء ) صوبہ سندھ کے دارالحکومت کراچی میں اداکارہ حمیرا اصغر کی موت کے کیس میں عدالت نے پولیس کو قتل کا مقدمہ درج کرتے ہوئے مرحومہ کے اہل خانہ کے بیانات قلمبند کرنے کی ہدایت کردی۔ تفصیلات کے مطابق اداکارہ حمیرا اصغر کی لاش ملنے کے واقعے پر ایڈووکیٹ شاہ زیب سہیل کی قتل کا مقدمہ درج کرنے کی درخواست پر سماعت ہوئی، ایڈیشنل ڈسٹرکٹ اینڈ سیشن جج ساؤتھ نے فیصلہ سناتے ہوئے درخواست نمٹا دی اور پولیس کو ہدایت کی کہ قانون کے مطابق کارروائی کی جائے، پولیس 154 کے تحت مقدمہ درج کرنے کی پابند ہے، اگر مقدمہ بنتا ہے تو درج کیا جائے، اس کے علاوہ ایڈیشنل ڈسٹرکٹ اینڈ سیشن جج ساؤتھ نے مرحومہ کے اہل خانہ کے بیانات قلمبند کرنے اور قانونی تقاضے پورے کرنے کی بھی ہدایت کی۔

(جاری ہے)

عدالت میں جمع کرائی جانے والی پولیس رپورٹ میں بتایا گیا کہ ’حمیرا اصغر کا پوسٹ مارٹم مکمل ہوچکا اور فرانزک رپورٹ کا انتظار ہے، اداکارہ کے اہل خانہ سے رابطہ کیا گیا تاہم مزید کارروائی فرانزک رپورٹ آنے کے بعد کی جائے گی‘، جس پر درخواست گزار کے وکیل عبدالاحد ایڈووکیٹ نے مؤقف اختیار کیا کہ ’حمیرا اصغر کو قتل کیا گیا ہے لہٰذا ایف آئی آر درج کرنے کا حکم دیا جائے‘۔

انہوں نے کہا کہ ’مرحومہ کی موت 7 اکتوبر کو ہوئی لیکن اس کا فون فروری تک استعمال ہوا، فون کھلا ہوا تھا، میک اپ آرٹسٹ کا نمبر اٹینڈ نہیں ہوا، بعد ازاں حمیرا کی واٹس ایپ ڈی پی بھی ڈیلیٹ کردی گئی، میک اپ آرٹسٹ کو بھی عدالت میں بلایا جائے اور حمیرا کے بھائی سمیت دیگر افراد کو شاملِ تفتیش کیا جائے، پولیس رپورٹ میں بھی واش روم اور کمرے سے خون کے نمونے لینے کا ذکر موجود ہے، اس لیے واضح طور پر یہ قتل کا واقعہ ہے‘۔