خیبر پختونخوا میں آرمی فلڈ ریلیف آپریشن پر سیلاب متاثرہ علاقوں کے عوام نے پاک فوج کو خراج تحسین پیش کیا ہے،محکمہ انتظامیہ کے پی کے

پیر 18 اگست 2025 18:00

پشاور (اُردو پوائنٹ اخبارتازہ ترین - اے پی پی۔ 18 اگست2025ء) خیبر پختونخوا میں آرمی فلڈ ریلیف آپریشن پر سیلاب متاثرہ علاقوں کے عوام نے پاک فوج کو خراج تحسین پیش کیا ہے۔محکمہ انتظامیہ خیبرپختونخوا کے مطابق سیلاب سے متاثرہ بونیر، باجوڑ، سوات اور مالاکنڈ ڈویژن میں پاک فوج کی خدمات پر عوام نے فوج سے اظہار تشکر کرتے ہوئے کہا ہے کہ ہم پاک فوج کے شکر گزار ہیں کہ انہوں نے مشکل وقت میں ہماری مدد کی جب کوئی اور نہیں پہنچ سکا۔

مقامی افراد نے بتایا کہ ہمارے جوانوں نے دن رات کی پروا کیے بغیر یہاں آ کر لوگوں کو بحاظت ریسکیو کیا، ہماری بروقت مدد پر ہم دل سے پاک فوج کے شکر گزار ہیں، ہم نے اپنی آنکھوں سے دیکھا کہ پاک فوج دن رات عوام کی خدمت کے لیے موجود رہی۔عوام کا کہنا تھا کہ ہم نے ہیلی کاپٹروں کو یہاں آتے دیکھا جو لوگوں کو امداد فراہم کر رہے تھے، بچوں، خواتین اور بزرگوں کو محفوظ مقامات تک منتقل کر رہے تھے، اگر ہماری فوج نہ ہوتی تو شاید ہمیں کوئی سہارا نہ ملتا کیونکہ ہمارے ایم این اے یا نمائندے تو یہاں آئے ہی نہیں۔

(جاری ہے)

سیلاب متاثرہ علاقوں کے عوام کا مزید کہنا تھا کہ یہ وہی فوج ہے جسے بعض لوگ تنقید کا نشانہ بناتے ہیں لیکن یہی فوج ہماری مدد کے لیے مشینری سمیت پہنچی اور ہمارے ساتھ کھڑی رہی، ہم پاک فوج کے جذبے اور خدمت کو دل سے سراہتے ہیں۔