5اسٹار ہوٹل میں قیام، اعلیٰ درجے کی گاڑیاں اور سفارتی تحائف

مریم نواز کے دورہ جاپان کیلئے 16 کروڑ روپے کے اخراجات منظور کیے جانے کا انکشاف

محمد علی پیر 18 اگست 2025 18:29

لاہور (اُردو پوائنٹ اخبارتازہ ترین۔ 18 اگست2025ء) 5اسٹار ہوٹل میں قیام، اعلیٰ درجے کی گاڑیاں اور سفارتی تحائف، مریم نواز کے دورہ جاپان کیلئے 16 کروڑ روپے کے اخراجات منظور کیے جانے کا انکشاف۔ 24 نیوز کی رپورٹ کے مطابق پنجاب کی وزیرِ اعلیٰ مریم نواز شریف کے جاپان کے دورے کے اخراجات کے لیے ابتدائی طور پر ۱۰۰ لاکھ روپے کی بجائے 16 کروڑ روپے (Rs160m) کی رقم منظور کی گئی جس میں پانچ اسٹار ہوٹل میں قیام، اعلیٰ درجے کی گاڑیاں اور سفارتی تحائف شامل ہیں ۔

دوسری جانب وزیراعلی مریم نواز شریف نے جاپان کے تجارتی، معاشی اور ثقافتی مرکز’یوکو ہاما‘ (Yokohama ) شہر کا دورہ کیا۔ یوکوہاما اور صوبہ پنجاب میں ماحولیات اور شہروں کو جدید ترقیاتی نظام فراہم کرنے سمیت مختلف شعبوں میں ’سٹی ٹو سٹی‘ تعاون پر اتفاق کیا گیا۔

(جاری ہے)

وزیر اعلی پنجاب مریم نواز شریف اور ان کے وفد کو یوکو ہاما کے ٹاؤن ہال میں اربن ڈویلپمنٹ پر بریفنگ دی گئی۔

پنجاب میں سڑکوں اور عمارتوں کا تعمیراتی معیار جاپان کے برابر لانے پر بات چیت کی گئی۔ راوی اربن ڈویلپمنٹ اتھارٹی (روڈا) اور یوکو ہاما میں تعاون کے مختلف امکانات پر غور کیا گیا۔ لاہور اسلام آباد کے درمیان تیز رفتار ٹرین چلانے اور ریلوے اپ گریڈیشن میں تعاون کے امکانات کا بھی جائزہ لیا گیا۔وزیر اعلیٰ مریم نواز شریف نے جدید ترین جاپانی چیئر لفٹ اور ائیر کیبن منصوبوں کا جائزہ لیا۔

’کن ہن‘ ریجن میں واقع ٹوکیو، کا واساکی اور یوکو ہاما کے تین شہر جاپان کا صنعتی زون کہلاتے ہیں۔ ’یوکوہاما‘ آبادی کے لحاظ سے جاپان کا دوسرا بڑا شہر ہے۔ مئی 2025 میں ایشیائی ترقیاتی بنک کی سالانہ کانفرنس’یوکوہاما‘ کو پورے ایشیا میں ماحولیاتی بہتری کے حوالے سے سب سے ترقی یافتہ شہر قرار دے چکی ہے۔وزیراعلی مریم نواز جاپان کے پانچ دن کے دورے پر ہیں۔