خیبرپختونخوا میں سیلاب سے متاثرہ متعدد پل ٹریفک کے لیے تاحال کھولے نہ جاسکے ،محکمہ تعمیرات کے پی کے

منگل 19 اگست 2025 18:49

پشاور (اُردو پوائنٹ اخبارتازہ ترین - اے پی پی۔ 19 اگست2025ء) خیبرپختونخوا میں سیلاب سے متاثرہ متعدد پل ٹریفک کے لیے تاحال نہ کھولے جاسکے ، 56 پلوں میں سے صرف 9 پلوں کو ہی ٹریفک کے لیے مکمل کھولا جاسکا ہے۔منگل کو محکمہ تعمیرات و مواصلات کے پی کے کے مطابق 47 پلوں کو مکمل طور پر فعال نہ بنانے سے مقامی لوگوں کو شدید مشکلات کا سامنا ہے، تباہ شدہ 56 میں سے 36 پلوں پر جزوی طور پر ٹریفک بحال کردی گئی ہے۔

(جاری ہے)

دستیاب دستاویز میں بتایا گیا ہے کہ مردان کے 16 تباہ شدہ پلوں میں سے اب تک کسی ایک پل کو بھی مکمل طور پر بحال نہیں کیا جاسکا ہے، اپر اور لوئر دیر میں سیلاب سے 11 پل متاثر ہوئے، اب تک کسی ایک کو بھی مکمل طور پر ٹریفک کے لیے کھولا نہیں جاسکا ہے۔ سوات کے 8 پلوں میں سے صرف 2 کو ٹریفک کے لیے کھولا گیا ہے۔ سیلاب کے باعث چترال میں متاثرہ 2 پل بھی ٹریفک کے لیے مکمل طور پر بحال نہ ہوسکے، کوہستان میں 4، ہری پور میں 3 پلوں کی مرمت ابھی ہونی ہے، کرم کے دو اور مانسہرہ کے بھی دو پل مرمت کے منتظر ہیں۔خیبرپختونخوا کے چند اضلاع کے 4 ہزار 804 میٹر پلوں میں 4 ہزار 478 میٹر کو نقصان پہنچا ہے۔