پنجاب بھر کی فیڈ ملز میں گندم کے استعمال پر فوری پابندی عائد

ْمحکمہ داخلہ پنجاب نے گندم، آٹے اور روٹی کی بلا تعطل فراہمی یقینی بنانے کیلئے دفعہ 144نافذ کر دی

ہفتہ 4 اکتوبر 2025 21:59

پنجاب بھر کی فیڈ ملز میں گندم کے استعمال پر فوری پابندی عائد

لاہور (اُردو پوائنٹ اخبارتازہ ترین - این این آئی۔ 04 اکتوبر2025ء) حکومت پنجاب نے صوبہ بھر کی فیلڈ ملز میں گندم کو مرغیوں کے دانے میں استعمال کرنے پر دفعہ 144نافذ کر دی ۔ محکمہ داخلہ پنجاب کے جاری کردہ نوٹیفیکیشن کے مطابق دفعہ 144کا نفاذ گندم، آٹے اور روٹی کی بلا تعطل فراہمی یقینی بنانے کیلئے کیا گیا۔ حکمنامے کے مطابق گندم صرف فلور ملز میں آٹا بنانے کیلئے استعمال ہو گی اور گندم کے فیلڈ ملز میں استعمال پر گزشتہ ماہ لگائی گئی پابندی میں ایک ماہ کی توسیع کر دی گئی ہے۔

ترجمان محکمہ داخلہ پنجاب نے بتایا کہ حکومت پنجاب نے صوبے میں گندم کی ممکنہ قلت کے خدشات کے پیشِ نظر یہ اہم فیصلہ کیا۔ انہوں نے بتایا کہ پنجاب میں فیڈ ملز کے پاس 1لاکھ میٹرک ٹن سے زائد گندم کا ذخیرہ موجود تھا۔

(جاری ہے)

سیکرٹری پرائس کنٹرول اینڈ کموڈٹیز مینجمنٹ کی رپورٹ کے مطابق فیڈ ملز اس بڑی مقدار میں گندم کو مرغیوں کے دانے کیلئے استعمال کرنے والی تھیں۔

ترجمان محکمہ داخلہ پنجاب کے مطابق گندم انسانوں کی بنیادی خوراک ہے جسے مرغیوں کے دانے کی بجائے آٹے کی تیاری میں استعمال ہونا چاہیے۔ محکمہ داخلہ پنجاب نے صوبہ بھر میں فیڈ ملز پر مزید 30یوم کیلئے گندم کے استعمال پر پابندی عائد کی ہے۔ سیکرٹری داخلہ پنجاب نے ضابطہ فوجداری 1898کی دفعہ 144(6)کے تحت پابندی عائد کی۔ محکمہ داخلہ پنجاب کے جاری کردہ نوٹیفیکیشن کے مطابق پابندی کا اطلاق اتوار 2نومبر تک ہوگا۔ عوام الناس کی آگاہی کیلئے حکمنامے کی سرکاری گزٹ، اخبارات و ذرائع ابلاغ کے زریعے بھرپور تشہیر کی ہدایت بھی کی گئی ہے۔