وفاقی وزیر مواصلات عبدالعلیم خان کاگلگت بلتستان میں سیلاب سے متاثرہ علاقوں کا دورہ

منگل 19 اگست 2025 19:15

گلگت (اُردو پوائنٹ اخبارتازہ ترین - اے پی پی۔ 19 اگست2025ء) وفاقی وزیر مواصلات عبدالعلیم خان سیلاب سے متاثرہ علاقوں کے دورے کے لیے گلگت پہنچ گئے۔ اس موقع پر انہوں نے جگلوٹ سکردو روڈ پر بہہ جانے والے ستک پل کا معائنہ کیا اور بحالی کے کام کا جائزہ لیا۔وفاقی وزیر نے گفتگو کرتے ہوئے کہا کہ این ایچ اے نے ہیوی مشینری کے ذریعہ دن رات کام کر کے سکردو روڈ کو کم سے کم وقت میں دو طرفہ ٹریفک کے لئے بحال کر دیا ہے۔

انہوں نے ہدایت کی کہ آبشار سے گرنے والے پانی کو سڑک کے نیچے سے گزارنے کے اقدامات کیے جائیں تاکہ مسافر اور شاہراہیں محفوظ رہیں۔ان کا کہنا تھا کہ متاثرہ شاہراہوں پر این ایچ اے اور ایف ڈبلیو او نے مشترکہ خدمات سر انجام دیں اور یہ بحالی کا مشن مسلسل جاری رہے گا۔

(جاری ہے)

انہوں نے کہا کہ شمالی علاقہ جات میں روڈ انفراسٹرکچر کو بڑے پیمانے پر نقصان پہنچا ہے لیکن این ایچ اے حکام پوری طرح سرگرم عمل ہیں اور تعمیر و مرمت کا کام دن رات جاری ہے۔

عبدالعلیم خان نے صوبائی حکومت سے مکمل رابطے میں ہونے کا ذکر کرتے ہوئے کہا کہ متاثرہ سڑکوں کی مرمت جلد مکمل کر لی جائے گی۔ انہوں نے گلگت بلتستان کی دیگر شاہراہوں پر ٹریفک کھلنے اور بعض مقامات پر بحالی کے کام جاری رہنے کی تصدیق کی۔وفاقی وزیر نے بارشوں اور سیلابی ریلوں سے ہونے والے جانی و مالی نقصانات پر افسوس کا اظہار کیا اور سینئر افسران کو موقع پر ہدایات دیں۔ وفاقی سیکرٹری مواصلات اور دیگر افسران نے وزیر کو اب تک کی صورتحال پر تفصیلی بریفنگ دی۔