جماعت نہم کے سالانہ امتحانات 2025ء کے نتائج کا اعلان،کامیابی کا تناسب 42.06 فیصد رہا

بدھ 20 اگست 2025 15:57

راولپنڈی (اُردو پوائنٹ اخبارتازہ ترین - اے پی پی۔ 20 اگست2025ء) بورڈ آف انٹرمیڈیٹ اینڈ سیکنڈری ایجوکیشن راولپنڈی نے جماعت نہم کے سالانہ امتحانات 2025ء کے نتائج کا اعلان کردیا ۔بدھ کو منعقدہ تقریب میں چیئرمین تعلیمی بورڈ راولپنڈی محمد عدنان خان، کنٹرولر امتحانات تنویر اصغر اعوان،سیکرٹری بورڈ پروفیسر امجد اقبال خٹک سمیت بورڈ کے دیگر اعلیٰ افسران شریک تھے۔

نتائج کے مطابق امتحان نہم سالانہ 2025ء میں کل 128453 اُمیدواروں نے داخلہ جمع کرایا جن میں سے 125989 اُمیدوار امتحان میں شامل ہوئے۔ کامیاب ہونے والے اُمیدواروں کی تعداد 53657 رہی، یوں کامیابی کا تناسب 42.06 فیصد رہا جبکہ 72312 اُمیدوار امتحان میں ناکام رہے۔ مزید برآں 2055 اُمیدوار امتحان میں غیر حاضر رہے اور 409 داخلہ فارم مختلف وجوہات کی بنیاد پر منسوخ کیے گئے۔

(جاری ہے)

امتحان میں شریک اُمیدواران میں طلبا کی تعداد 62332 اور طالبات کی تعداد 63357 رہی جو تعلیمی میدان میں طالبات کی بڑھتی دلچسپی اور شمولیت کی عکاس ہے۔چیئرمین تعلیمی بورڈ، راولپنڈی محمد عدنان خان نے تقریب سے خطاب کرتے ہوئے کنٹرولر امتحانات اور ان کی ٹیم کو امتحانات کے شفاف انعقاد اور بروقت نتائج کی اشاعت پر خراج تحسین پیش کیا۔ انہوں نے کہا کہ میں کنٹرولر امتحانات، سیکرٹری بورڈ، تمام افسران و ملازمین کو اُن کی شب و روز کی محنت، دیانت داری اور پیشہ ورانہ ذمہ داریوں کو احسن انداز میں نبھانے پر دل کی گہرائیوں سے مبارکباد پیش کرتا ہوں۔

ان کا کہنا تھا کہ بورڈ کی کارکردگی نے نہ صرف شفافیت کو یقینی بنایا بلکہ دیگر بورڈز کے لیے بھی ایک مثال قائم کی، میری کوشش ہو گی کہ آئندہ امتحانات میں بھی بورڈ آف راولپنڈی اپنی روایت کو برقرار رکھتے ہوئے مزید بہتری اور ترقی کی جانب گامزن رہے۔چیئرمین نے کہا کہ بورڈ کی نیک نامی اور وقار ہم سب کی اجتماعی کوششوں کا نتیجہ ہے اور ہمیں اس ادارے کو مزید بلند مقام تک پہنچانے کے لیے بھرپور عزم و عمل کے ساتھ کام کرنا ہو گا۔

Facebook Twitter Google + Share on Whatsapp

جماعت نہم کے سالانہ امتحانات 2025ء کے نتائج کا اعلان،کامیابی کا تناسب 42.06 فیصد رہا

مزید تعلیم کی خبریں