دبئی، 25 ملین ڈالرز کا نایاب گلابی ہیرا چوری، اسمگل کی کوشش ناکام

بدھ 20 اگست 2025 16:02

دبئی (اُردو پوائنٹ اخبارتازہ ترین - این این آئی۔ 20 اگست2025ء)دبئی پولیس نے 25 ملین ڈالرز کے نایاب گلابی ہیرے کی چوری کو ناکام بنا دیا۔غیر ملکی میڈیا رپورٹس کے مطابق پولیس کا کہنا تھا کہ چوروں کا ایک گروہ نایاب گلابی ہیرا چوری کر کے متحدہ عرب امارات سے اسمگل کرنے کا منصوبہ بنا رہا تھا جسے بروقت کارروائی کے بعد ناکام بنا دیا گیا۔

(جاری ہے)

دبئی حکام کے مطابق مبینہ طور پر 3 مشتبہ افراد نے 20 قیراط سے وزنی 25 ملین ڈالر کے ہیرے کی خریداری میں دلچسپی ظاہر کرتے ہوئے ایک جیولر سے ہیرا چرانے کی کوشش کی۔

حکام کا کہنا تھا کہ پولیس نے ڈکیتی کے 8 گھنٹوں کے اندر ملزمان کو گرفتار کر لیا۔ چوری کیے گئے ہیرے کو ایک چھوٹے ریفریجریٹر کے ذریعے اسمگل کرنے کا منصوبہ بنایا گیا تھا۔پولیس کا کہنا تھا کہ ہیرے کے چور ایک سال سے ڈکیتی کی منصوبہ بندی کر رہے تھے۔