متحدہ عرب امارات کا غزہ میں 75 واں ایئر ڈراپ آپریشن مکمل

یہ امدادی سامان امارات کے خیراتی اداروں کے تعاون سے بھیجا گیا،عرب ٹی وی

بدھ 20 اگست 2025 17:26

غزہ(اُردو پوائنٹ اخبارتازہ ترین - این این آئی۔ 20 اگست2025ء)متحدہ عرب امارات کا غزہ میں 75 واں ایئر ڈراپ آپریشن مکمل ہو گیا جس کے تحت خوراک، ہنگامی طبی امداد اور ضروری امدادی اشیا فضا سے گرائی گئیں۔ عرب ٹی وی کے مطابق یہ امدادی ایئر ڈراپ آپریشن اردن کے تعاون سے کیا جا رہا ہے، جرمنی، اٹلی، فرانس، ہالینڈ،بیلجیم اور ملائیشیا اس میں شامل ہیں۔

(جاری ہے)

یہ امدادی سامان امارات کے خیراتی اداروں کے تعاون سے بھیجا گیا تاکہ غزہ میں مشکل صورتحال سے دوچار فلسطینیوں کی ضروریات کو پورا کیا جا سکے۔اب تک مجموعی طور پر 4 ہزار 12 ٹن سے زیادہ امدادی سامان غزہ پہنچایا جا چکا ہے جس میں خوراک اور اشیا ضروریہ شامل ہیں۔ غزہ میں انسانی ہمدردی کی کوششیں متحدہ عرب امارات کی فلسطینی عوام کی حمایت کے عزم کو ظاہر کرتی ہیں۔ واضح رہے کہ غزہ میں جاری اسرائیلی حملوں کے نتیجے میں قحط کی بدترین صورتحال سامنے آرہی ہے اور وسیع پیمانے پر اموات سے بچنے کیلیے فوری اقدامات کی ضرورت ہے۔