امریکا قطری فضائیہ کے لڑاکا پائلٹس کو تربیت فراہم کرے گا

نیا مرکزامریکی ریاست آئیڈاہو کے مانٹین ہوم ایئر فورس بیس پر قائم کیا جائے گا،وزیردفاع

ہفتہ 11 اکتوبر 2025 16:26

امریکا قطری فضائیہ کے لڑاکا پائلٹس کو تربیت فراہم کرے گا

واشنگٹن (اُردو پوائنٹ اخبارتازہ ترین - این این آئی۔ 11 اکتوبر2025ء) امریکی وزارتِ دفاع نے کہا ہے کہ امریکا قطری فضائیہ کے لڑاکا پائلٹس کو تربیت فراہم کرے گا۔بین الاقوامی خبر رساں ادارے کی رپورٹ کے مطابق امریکی وزیرِ دفاع پیٹ ہیگستھ کا کہنا تھا کہ امریکی فضائیہ قطری فضائیہ کوتربیت دینے کے لیے ایک نیا مرکز قائم کرنے جارہی ہے۔امریکی وزیرِ دفاع کے مطابق یہ نیا مرکرکز امریکی ریاست آئیڈاہو کے مانٹین ہوم ایئر فورس بیس پر قائم کیا جائے گا۔

پیٹ ہیگستھ کے مطابق یہاں قطری ایئر فورس کے ایف-15 پائلٹس کی جنگی صلاحیتوں میں اضافے کے لیے کام کیا جائے گا، جس سے ان کی جنگی صلاحیت اور نئی ممکنہ جنگی صورتحال سے نمٹنے کے لیے آگاہی فراہم کی جائیگی۔امریکی وزارت دفاع کے مطابق اس نئے دفاعی سہولتی مرکز کی تعمیر پر آنے والا خرچ قطری حکومت اٹھائے گی۔

(جاری ہے)

امریکی وزارتِ دفاع کی جانب سے یہ اعلان امریکی صدر ٹرمپ کے صدارتی آرڈر کے جاری ہونے کے بعد سامنے آیا ہے جس میں انہوں نے قطر کے دفاع کے لیے امریکی فوجی کارروائی سمیت تمام ممکنہ اقدامات استعمال کرنے کے عزم کا اظہار کیا تھا۔

ٹرمپ نے کہا کہ قطر کے دفاع کیلئے فوجی کارروائی سمیت تمام اقدامات کریں گے، قطر امن، استحکام اور خوشحالی کی جدوجہد میں امریکا کا ثابت قدم اتحادی ہے۔ڈونلڈ ٹرمپ نے امریکا اور قطر کے تعلقات مزید مضبوط بنانے کا اعلان کرتے ہوئے کہا تھا کہ امریکا اور قطر قریبی فوجی تعاون اور مشترکہ مفادات کے رشتے میں جڑے ہیں۔