Live Updates

گورنرہاؤس میں قائم رین ایمرجنسی سیل پر شہریوں کی شکایات کا تانتا بندھ گیا

ہزاروں شہریوں نے نکاسی آب، بجلی کی بندش اور نالوں کی صفائی کے مسائل رپورٹ کئے

بدھ 20 اگست 2025 17:35

کراچی (اُردو پوائنٹ اخبارتازہ ترین - این این آئی۔ 20 اگست2025ء)گورنر سندھ کامران خان ٹیسوری کی ہدایت پر گورنر ہاؤس میں قائم کئے گئے رین ایمرجنسی سیل میں شہریوں کی شکایات کا سلسلہ مسلسل جاری ہے، جہاں اب تک ہزاروں افراد نے مختلف مسائل کے حوالے سے رجوع کیا ہے۔رپورٹس کے مطابق شہریوں نے ایمرجنسی سیل پر رابطہ کرکے اپنے علاقوں میں بارش کے پانی کی نکاسی میں تاخیر، بجلی کی طویل بندش، گٹروں کے اٴْبلنے اور برساتی نالوں کی بندش سمیت دیگر سنگین مسائل سے آگاہ کیا۔

متعدد علاقوں سے اطلاعات موصول ہوئیں کہ بارش کے پانی کی نکاسی نہ ہونے کے باعث مکانات اور دکانیں متاثر ہوئیں جبکہ سڑکوں پر گھنٹوں ٹریفک جام رہا۔گورنر سندھ کی ہدایت پر متعلقہ اداروں کو فوری طور پر شکایات کے ازالے کی ہدایت دی جارہی ہے۔

(جاری ہے)

ایمرجنسی سیل میں موصول ہونے والی شکایات براہِ راست ڈپٹی کمشنرز، واٹر بورڈ، کے الیکٹرک اور دیگر متعلقہ محکموں تک پہنچائی جا رہی ہیں تاکہ شہریوں کو بروقت ریلیف فراہم کیا جاسکے۔

گورنر سندھ کامران خان ٹیسوری نے کہا کہ "مشکل کی اس گھڑی میں شہری تنہا نہیں، ان کے مسائل کے حل کے لیے گورنر ہاؤس کے دروازے ہر وقت کھلے ہیں۔" انہوں نے مزید کہا کہ شہری کسی بھی شکایت یا ہنگامی صورتحال میں براہِ راست ہیلپ لائن 1366 پر رابطہ کریں تاکہ فوری اقدامات کئے جا سکیں۔