سیکرٹری پرائس کنٹرول کی زیر صدارت صوبہ بھر میں چینی سپلائی بارے اجلاس

بدھ 20 اگست 2025 23:50

لاہور (اُردو پوائنٹ اخبارتازہ ترین - اے پی پی۔ 20 اگست2025ء) سیکرٹری پرائس کنٹرول ڈاکٹر احسان بھٹہ کی زیر صدارت صوبہ بھر میں چینی سپلائی بارے اجلاس ہوا۔

(جاری ہے)

ترجمان کے مطابق کین کمشنر پنجاب نے مختلف ڈویژن میں فراہم کردہ چینی سٹاک کی تفصیلات بارے آگاہ کیا، بریفنگ میں بتایا گیا کہ گزشتہ 2 روز میں عام مارکیٹ اور صنعتی استعمال کیلئے 3 لاکھ 81 ہزار 518 میٹرک ٹن چینی فراہم کی جا چکی ہے، مارکیٹ میں 5 روز اسپیشل ریلیف کے بعد 175 روپے فی کلوگرام چینی فروخت ہورہی ہے، گزشتہ24 گھنٹوں میں لاہور ڈویژن کیلئے 487 میٹرک ٹن اور گوجرانولہ ڈویژن کیلئے 635 میٹرک ٹن چینی فراہم کی گئی ہے،اسی طرح سرگودھا ڈویژن کیلئے 1 ہزار 328, راولپنڈی 428 میٹرک ٹن، ساہیوال کیلئے 284 میٹرک ٹن، بہاولپور ڈویژن میں 4 ہزار 87، ڈی جی خان 1 ہزار 914 میٹرک ٹن، فیصل آباد ڈویژن میں 2 ہزار 450 میٹرک ٹن اور ملتان ڈویژن میں 928 میٹرک ٹن چینی کی فراہمی یقینی بنائی جا چکی ہے، سیکرٹری پرائس کنٹرول کا کہنا تھا کہ عام مارکیٹ میں چینی سپلائی کے تناسب کو دو گنا کرنے سے ناجائز منافع خوروں کی حوصلہ شکنی ہوگی، گھریلو و صنعتی استعمال کیلئے مارکیٹ میں چینی سپلائی چین کو مانیٹر کرنے کیلئے اسپیشل مانیٹرنگ سسٹم وضع کر دیا گیا ہے۔