یورپی ممالک میں مقیم پاکستانیوں کی ترسیلات زر میں 17فیصد اضافہ

پہلی سہ ماہی میں مجموعی ترسیلات زر کا حجم 9.536ارب ڈالر ریکارڈ

پیر 13 اکتوبر 2025 20:50

یورپی ممالک میں مقیم پاکستانیوں کی ترسیلات زر میں 17فیصد اضافہ

اسلام آباد (اُردو پوائنٹ اخبارتازہ ترین - این این آئی۔ 13 اکتوبر2025ء) یورپی ممالک میں کام کرنیوالے پاکستانیوں کی ترسیلات زر میں جاری مالی سال کی پہلی سہ ماہی میں سالانہ بنیاد پر 17فیصد اضافہ ریکارڈ کیا گیا ہے ۔

(جاری ہے)

سٹیٹ بینک کے مطابق مالی سال کی پہلی سہ ماہی میں یورپی یونین میں شامل ممالک سے ترسیلات زر کا حجم 1.281ارب ڈالر ریکارڈ کیا گیا جو گزشتہ مالی سال کی اسی مدت کے مقابلے میں 17فیصد زیادہ ہے ، گزشتہ مالی سال کی اسی مدت میں یورپی یونین میں شامل ممالک سے ترسیلات زر کا حجم 1.092ارب ڈالر ریکارڈ کیا گیا تھا۔

ستمبر میں یورپی یونین کے ممالک سے ترسیلات زر کا حجم 424 ملین ڈالر ریکارڈ کیا گیا جو گزشتہ سال ستمبر کے مقابلے میں 16فیصد زائد ہے، گزشتہ سال ستمبر میں یورپی یونین سے ترسیلات زر کا حجم 366ملین ڈالر ریکارڈ کیا گیا تھا۔اگست کے مقابلے میں ستمبر میں یورپی یونین سے ترسیلات زر میں ماہانہ بنیاد پر 2فیصد کمی ریکارڈ کی گئی ۔ اگست میں یورپی یونین میں شامل ممالک میں کام کرنے والے پاکستانیوں کی ترسیلات زر کا حجم 433ملین ڈالر ریکارڈ کیا گیا تھا جو ستمبر میں کم ہو کر 424ملین ڈالر ہو گیا۔