کراچی سے صوابی جانیوالے مہمانوں کا مکان گرگیا، متاثرہ شخص نے ساری روداد سنادی

جیسے ہی کراچی گھر پہنچا فون آیا کہ صوابی میں آپ کا مکان گرگیا‘ والدہ، تین بہنیں اور بھانجے تھے جو مٹی کے نیچے دفن ہوگئے‘گفتگو

جمعرات 21 اگست 2025 12:22

صوابی (اُردو پوائنٹ اخبارتازہ ترین - این این آئی۔ 21 اگست2025ء)خیبر پختونخوا کے ضلع صوابی کے علاقے میں کلاؤڈ برسٹ سے ایک ایسا گھر بھی متاثر ہوا جس میں کراچی سے مہمان آئے ہوئے تھے جو زندگی کی بازی ہار گئے۔کراچی سے صوابی گئے لوگوں کے ایک رشتے دار نے بتایا کہ ہم کراچی سے صوابی گھومنے آئے تھے، 15 دن سے آئے ہوئے تھے جس کے بعد میں واپس کراچی چلا گیا۔

مذکورہ شخص نے بتایا کہ میں جیسے ہی کراچی اپنے گھر پہنچا تو فون آیا کہ یہاں صوابی میں آپ کا مکان گرگیا ہے جس میں میری والدہ، تین بہنیں اور بھانجے تھے جو مٹی کے نیچے دفن ہوگئے۔انہوں نے بتایا کہ ہمارے ہاں ایسی کوئی سہولت موجود نہیں کہ گاڑی جلدی آجائے، یہاں سے سارے گاؤں والوں نے ہمت کی اور چارپائیوں پر نیچے لے کے گئے، یہ بہت افسوسناک واقعہ ہے، ہمارے گمان میں بھی نہیں تھا، گزشتہ کئی عرصے سے ہم یہاں نہیں آئے تھے، چاچا نے گھر بنایا تھا تو اسے دیکھنے آئے تھے۔

(جاری ہے)

واضح رہے کہ صوابی میں بارشوں اور کلاؤڈبرسٹ سے 42 افراد جاں بحق ہوئے۔صوابی کے گاؤں دالوڑی بالا جہاں پر کچھ روز قبل کلاؤڈبرسٹ کی وجہ سے 17 گھر مکمل طور پر تباہ ہوئے اس میں 40 افراد ملبے کے نیچے دب گئے تھے۔ڈپٹی کمشنر صوابی نصراللہ نے جیونیوز کو بتایا کہ متاثرہ علاقے میں ریسکیو آپریشن مکمل کرلیا گیا ہے،ملبے سے 40 لوگوں کو نکالا گیا ہے جس میں 37 لاشیں اور تین زخمی شامل ہیں۔