اسلام آباد میں فی الحال اسٹیڈیم کی تعمیر کا ارادہ نہیں‘ چیئرمین سی ڈی اے

جمعرات 21 اگست 2025 19:48

اسلام آباد(اُردو پوائنٹ اخبارتازہ ترین - آن لائن۔ 21 اگست2025ء)کیپٹل ڈیولپمنٹ اتھارٹی (سی ڈی ای) کے چیئرمین محمد علی رندھاوا نے کہا ہے کہ اسلام آباد میں فی الحال اسٹیڈیم کی تعمیر کا ارادہ نہیں ہے۔نجی ٹی وی سے گفتگو کرتے ہوئے انہوں نے کہا کہ اسلام آباد میں کرکٹ اور فٹبال کے 25، 25 گراؤنڈز بنائیں گے، شہر میں کرکٹ اسٹیڈیم بنانے پر پی سی بی کے ساتھ میٹنگ ہوئی ہے۔

(جاری ہے)

محمد علی رندھاوا کا کہنا تھا کہ ماہرین کی رائے کے بعد دیکھیں گے کہ اسلام آباد میں کہاں کرکٹ اسٹیڈیم تعمیر کرنا ہے، اسٹیڈیم کی تعمیر کے لیے ماہرین ہی لوکیشن کا انتخاب کریں گے۔انہوں نے کہا کہ اسلام آباد میں مختلف کھیلوں کے گراؤنڈز بنانے کے منصوبے ہیں، شہر میں فی الوقت کرکٹ گراؤنڈز کے برے حالات ہیں، کرکٹ گراؤنڈز کی پچز کو انٹرنیشنل معیار کا بنانا ہے۔

ان کا کہنا تھا کہ ایف 9 پارک میں گراؤنڈ اپ گریڈ کرنے کے لیے راشد لطیف کی معاونت لی ہے۔واضح رہے کہ اس سے قبل یہ خبریں سامنے آئی تھیں کہ سی ڈی اے نے اسلام آباد کے ایف نائن پارک میں اسٹیڈیم بنانے کا فیصلہ کیا ہے تاہم اس حوالے سے شدید ردعمل آنے پر سی ڈی اے نے بعد ازاں وضاحت جاری کی تھی پارک میں کسی نئے اسٹیڈیم کو بنانے کا منصوبہ نہیں ہے۔