تعلیمی اداروں میں جدید سہولیات کی فراہمی حکومت بلوچستان کی اولین ترجیح ہے،ڈپٹی کمشنر سبی

جمعرات 21 اگست 2025 22:20

کوئٹہ (اُردو پوائنٹ اخبارتازہ ترین - اے پی پی۔ 21 اگست2025ء) ڈپٹی کمشنر سبی میجر (ر) الیاس کبزئی نے کہا ہے کہ تعلیمی اداروں میں جدید سہولیات کی فراہمی حکومت بلوچستان اور ورلڈ بینک اسپائر پراجیکٹ کی اولین ترجیحات میں شامل ہے۔ ان خیالات کا اظہار انہوں نے اسپائر ورلڈ بینک پروجیکٹ کے تحت گورنمنٹ بوائز ماڈل ہائی اسکول سبی میں نئی آئی ٹی لیب، تین کمروں، برآمدے اور دیگر سہولیات پر مشتمل عمارت کے افتتاح کے موقع پر کیا۔

اس موقع پر ڈسٹرکٹ ایجوکیشن آفیسر عبدالستار لانگو، پرنسپل گورنمنٹ بوائز ماڈل ہائی اسکول بیگ محمد رئسانی ، فوکل پرسن اسپائر پروجیکٹ سعید احمد سیلاچی، کمیٹی ممبران اشفاق سیلاچی، سلیم بگٹی سمیت دیگر موجود تھے۔ اسکول کے بینڈ دستے نے ڈپٹی کمشنر کا شاندار استقبال کیا اور قومی ترانے کی دھن بجا کر سلامی پیش کی۔

(جاری ہے)

افتتاحی منصوبے کے تحت عمارت کو 6kva سولر سسٹم سے منسلک کیا گیا ہے، جبکہ جدید 80 انچ ایل ای ڈی اسمارٹ بورڈ بمعہ کیمرہ اور جدید سافٹ ویئرز، نئے کمپیوٹرز اور دیگر سہولیات فراہم کی گئی ہیں۔

ڈپٹی کمشنر نے منصوبے کے تحت اسکول کو کتابیں بھی فراہم کیں۔ عمارت کا افتتاح ڈسٹرکٹ ایجوکیشن آفیسر عبدالستار لانگو سے جبکہ جدید آئی ٹی لیب کا افتتا ح ڈویژنل انفارمیشن آفس کے عنایت اللہ شاہ نے کیا۔ بعد ازاں ڈپٹی کمشنر، ڈسٹرکٹ ایجوکیشن آفیسر اور اسکول کے پرنسپل نے مون سون شجرکاری مہم کے تحت پودے بھی لگائے۔ ڈپٹی کمشنر سبی میجر (ر) الیاس کبزئی نے اپنے خطاب میں کہا کہ تعلیم ہی ترقی اور خوشحالی کی کنجی ہے۔ جدید دور کے تقاضوں کو پورا کرنے کے لیے تعلیمی اداروں میں نئی سہولیات کی فراہمی ناگزیر ہے۔