چینی کے مقرر کردہ نرخوں پر عملدرآمد نہ کرنیوالوں کیخلاف کریک ڈائون جاری

گزشتہ 24گھنٹوں کے دوران 296دکانداروں کیخلاف چینی کی قیمتوں میں ناجائز منافع خوری پر کارروائیاں اب تک 33ہزار820افراد کیخلاف کارروائیوں میں 2533افراد گرفتار، 391کیخلاف مقدمات درج کروائے گئے 2 روز سے وافر سٹاک کے باعث عام مارکیٹ میں نرخوں پر عملدرآمد میں واضح بہتری آئی ہے، ترجمان پرائس کنٹرول

جمعرات 21 اگست 2025 19:30

لاہور(اُردو پوائنٹ اخبارتازہ ترین - این این آئی۔ 21 اگست2025ء) چینی کے مقرر کردہ نرخوں پر عملدرآمد نہ کرنے والوں کے خلاف کریک ڈائون جاری ہے۔ترجمان پرائس کنٹرول اینڈ کماڈیٹیز مینجمنٹ ڈیپارٹمنٹ کے مطابق گزشتہ 24گھنٹوں کے دوران 296دکانداروں کیخلاف چینی کی قیمتوں میں ناجائز منافع خوری پر کارروائیاں کی گئیں، پنجاب بھر میں 25افراد گرفتار جبکہ 271افراد کو جرمانے عائد کیے گئے،اب تک 33ہزار820افراد کے خلاف کارروائیوں میں 2533افراد گرفتار اور391 کے خلاف مقدمات درج کروائے گئے ہیں، لاہور ڈویژن میں 10گراں فروشوں کے خلاف کارروائیاں کی گئیں ، گوجرانولہ ڈویژن میں 52اور فیصل آباد میں 61دوکانداروں کیخلاف چینی کے نرخوں کی خلاف ورزی پر کارروائیاں کی گئیں، ساہیوال ڈویژن میں 09، سرگودھا 25جبکہ راولپنڈی میں 32گراں فروشوں کے خلاف کارروائیاں کی گئیں،بہاولپور ڈویژن میں 37،ڈی جی خان 14 جبکہ ملتان میں 56چینی گراں فروشوں کیخلاف کارروائیاں کی گئیں۔

(جاری ہے)

ترجمان پرائس کنٹرول کا کہنا تھا کہ چینی کی قیمتوں میں مصنوعی اضافے اور قلت پیدا کرنیوالوں کو گرفتار اور بھاری جرمانے عائد کیے جارہے ہیں، 2روز سے وافر سٹاک کے باعث عام مارکیٹ میں نرخوں پر عملدرآمد میں واضح بہتری آئی ہے۔