عمرے کے خواہشمند افراد کیلئے خوشخبری،نسک عمرہ کے نام سے نئی آن لائن سروس کا آغاز

زائرین اپنی سہولت کے مطابق مختلف پیکجز منتخب کرسکتے ہیں،وزارت حج و عمرہ

جمعہ 22 اگست 2025 13:25

عمرے کے خواہشمند افراد کیلئے خوشخبری،نسک عمرہ کے نام سے نئی آن لائن ..
اسلام آباد(اُردو پوائنٹ اخبارتازہ ترین - این این آئی۔ 22 اگست2025ء)سعودی وزارت حج و عمرہ نے غیر ملکی مسلمانوں کیلئے عمرہ ویزا حاصل کرنے کا عمل مزید آسان بنا دیا ہے، وزارت نے نسک عمرہ کے نام سے نئی آن لائن سروس کا آغاز کیا ہے جس کے ذریعے اب زائرین بغیر کسی ایجنٹ یا ثالث کے براہِ راست ویزے کے لیے درخواست دے سکیں گے۔حکام کے مطابق یہ پلیٹ فارم زائرین کو ایک ہی جگہ پر ویزا اپلائی کرنے سے لے کر سفری سہولیات بک کرنے تک کا مکمل اور بآسانی تجربہ فراہم کرے گا،یہ نئی سہولت روایتی منظور شدہ ٹریول ایجنٹس کے ساتھ ساتھ ایک اضافی آپشن کے طور پر پیش کی گئی ہے، جس کے ذریعے زائرین اپنی ضرورت کے مطابق مکمل پیکج یا انفرادی سہولیات کا انتخاب کرسکتے ہیں۔

وزارت حج و عمرہ کے مطابق یہ پلیٹ فارم 7زبانوں میں دستیاب ہے اور سرکاری نیٹ ورکس سے منسلک ہے تاکہ ویزا کے اجرا اور دیگر خدمات میں تیزی لائی جاسکے،عالمی سطح پر صارفین کی سہولت کے لیے متعدد ادائیگی کے طریقے بھی فراہم کیے گئے ہیں۔

(جاری ہے)

اس ڈیجیٹل پلیٹ فارم کی بدولت عمرہ زائرین نہ صرف ویزا حاصل کر سکیں گے بلکہ رہائش، ٹرانسپورٹ اور مختلف ٹورز کی سہولتیں بھی آن لائن بک کرسکیں گے،یہ سہولت سرکاری ویب سائٹ umrah.nusuk.saپر دستیاب ہے۔

وزارت کے مطابق زائرین اپنی سہولت کے مطابق مختلف پیکجز منتخب کرسکتے ہیں جبکہ پلیٹ فارم پر منظور شدہ ٹریول ایجنٹس کی تفصیلات بھی فراہم کی گئی ہیں تاکہ اگر کسی کو آن لائن ایپ کے استعمال میں دشواری پیش آئے تو وہ ان ایجنٹس کے ذریعے بھی درخواست جمع کروا سکے۔حکومت نے بتایاکہ نسک عمرہ پلیٹ فارم سعودی وژن 2030کا حصہ ہے، جس کا مقصد زیادہ سے زیادہ مسلمانوں کی میزبانی اور حج و عمرہ کی خدمات کے معیار کو مزید بہتر بنانا ہے۔

متعلقہ عنوان :