دھی رانی پروگرام میں اجتماعی شادیوں کے لیے 5546 درخواستیں موصول

جمعہ 22 اگست 2025 17:50

لاہور (اُردو پوائنٹ اخبارتازہ ترین - این این آئی۔ 22 اگست2025ء)وزیراعلی پنجاب مریم نواز کی قیادت میں دھی رانی پروگرام 2025-26کے تحت اجتماعی شادیوں کے لیے درخواستوں کی وصولی کا عمل تیزی سے جاری ہے۔صوبائی وزیر سوشل ویلفیئر و بیت المال سہیل شوکت بٹ نے بتایا کہ اب تک اجتماعی شادیوں کے لیے 5546درخواستیں موصول ہو چکی ہیں، جن میں سے 2755درخواستوں کی تحصیل ویریفکیشن کمیٹیوں نے کامیابی سے تصدیق مکمل کر لی ہے۔

انہوں نے کہا کہ وزیراعلی پنجاب مریم نواز کے حکم پر رواں سال اجتماعی شادیوں کا ہدف 3000سے بڑھا کر 5000کر دیا گیا ہے۔ ستمبر سے پنجاب بھر میں پروقار اجتماعی شادیوں کی تقاریب کا آغاز کر دیا جائے گا جو جون 2026ء تک انشااللہ مکمل کر لی جائیں گی۔سہیل شوکت بٹ نے مزید کہا کہ وزیراعلی مریم نواز کی ہدایت ہے کہ اجتماعی شادیوں میں شامل جوڑوں کی تعداد 5000سے بھی زیادہ بڑھائی جائے۔

(جاری ہے)

وزیراعلی پنجاب کا عزم ہے کہ پنجاب کی کوئی بیٹی وسائل کی کمی کے باعث شادی جیسے مقدس فریضے سے محروم نہ رہے۔انہوں نے کہا کہ اجتماعی شادیوں کا تمام خرچ گزشتہ برس کی طرح اس سال بھی مکمل طور پر حکومت پنجاب برداشت کرے گی۔ ہر جوڑے کو 2لاکھ روپے مالیت کا سلامی کارڈ حکومت پنجاب کی طرف سے بطور تحفہ دیا جائے گا۔سہیل شوکت بٹ نے اس بات پر زور دیا کہ درخواستوں کی ویریفکیشن میں مکمل شفافیت کو یقینی بنایا جا رہا ہے۔ جو والدین اپنی بیٹیوں کی شادی کے مقدس فریضے کی ادائیگی سے قاصر ہیں، وزیراعلی مریم نواز کا دھی رانی پروگرام ان کی دھی رانیوں کے خوابوں کو حقیقت کا روپ دے گا۔