صوبائی وزیر کی زیر صدارت ریسکیو ہیڈکوارٹر میں مون سون کے انتظامات بارے اہم اجلاس

حادثات کی شرح میں واضح کمی لانے کیلئے جامع حکمت عملی بنائی جائے گی‘ خواجہ سلمان رفیق

جمعہ 22 اگست 2025 14:47

صوبائی وزیر کی زیر صدارت ریسکیو ہیڈکوارٹر میں مون سون کے انتظامات بارے ..

لاہور (اُردو پوائنٹ اخبارتازہ ترین - این این آئی۔ 22 اگست2025ء) صوبائی وزیر صحت و ایمرجنسی سروسز خواجہ سلمان رفیق کی زیر صدارت ریسکیو ہیڈکوارٹر میں مون سون کے انتظامات بارے اہم اجلاس منعقدہوا۔اجلاس میں سیکرٹری ایمرجنسی سروسز پنجاب ڈاکٹر رضوان نصیر اور ریسکیو افسران نے شرکت کی۔صوبائی وزیر نے پراونشل مانیٹرنگ سیل میں صوبہ بھر کے ضلعی افسران سے بھی ویڈیو لنک کے زریعے بات چیت کی۔

اجلاس کے دوران رحیم یار خان میں گزشتہ روز حادثہ میں شہید ہونے والے ریسکیورز کیلئے دعا مغفرت کی گئی اور زخمیوں کی بہترین نگہداشت کی ہدایت کی گئی۔ٹیم لیڈر پاکستان ریسکیو ٹیم ڈاکٹر فرحان خالد نے پنجاب بھر میں جاری امدادی کارروائیوں سے متعلق بریفنگ دی۔صوبائی وزیر صحت و ایمرجنسی سروسز پنجاب خواجہ سلمان رفیق نے کہاکہ حادثات کی شرح میں واضح کمی لانے کیلئے جامع حکمت عملی بنائی جائے گی۔

(جاری ہے)

رحیم یار خان میں ریسکیورز نے شہریوں کی جان بچانے کی خاطر اپنی جانیں قربان کر دیں۔الحمدللہ نادرن ایریاز میں ریسکیو 1122 کی افادیت میں اضافہ ہو رہا ہے۔مون سون کے دوران ریسکیورز عوام کو باکمال خدمات فراہم کر رہے ہیں۔ خواجہ سلمان رفیق نے کہاکہ پنجاب کے دریاؤں میں الحمدللہ پانی کا بہاؤ معمول کے مطابق ہے۔متاثرہ 18 اضلاع میں ایک ہزار سے زائد ریسکیورز 260 سے زائد کشتیوں کی مدد سے عوام کو محفوظ مقامات پر منتقل کر رہے ہیں۔

اب تک 16 ہزار سے زائد لوگوں کا انخلاء اور ٹرانسپورٹ کیا جا چکا ہے۔صوبائی وزیر صحت خواجہ سلمان رفیق نے شہید ریسکیورز کے اہل خانہ سے اظہار تعزیت کیا اور پاک فوج اور ریسکیورز کی خدمات کو بے حد سراہا۔سیکرٹری محکمہ ایمرجنسی سروسز پنجاب ڈاکٹر رضوان نصیر نے کہاکہ مون سون کے دوران ہنگامی حالات سے نمٹنے کیلئے ریسکیورز کو الرٹ کر دیا گیا ہے۔متاثرہ اضلاع میں ریسکیورز ڈپلائمنٹ پلان کے مطابق فرائض سر انجام دے رہے ہیں۔