بانی پی ٹی آئی کو ضمانت دینے سے عدالت عظمیٰ کا سر بلند ہوا، اعظم سواتی

یہ اس بات کا ثبوت ہے کہ آج بھی عدالتیں حق اور انصاف کا فیصلہ دے سکتی ہیں، پی ٹی آئی رہنما

جمعہ 22 اگست 2025 13:25

بانی پی ٹی آئی کو ضمانت دینے سے عدالت عظمیٰ کا سر بلند ہوا، اعظم سواتی

پشاور(اُردو پوائنٹ اخبارتازہ ترین - این این آئی۔ 22 اگست2025ء)پاکستان تحریک انصاف کے رہنما سینیٹر اعظم سواتی نے کہا ہے کہ بانی پی ٹی آئی کو ضمانت دینے کے فیصلے سے عدالت عظمی کا سر بلند ہوا ہے۔پشاور ہائیکورٹ کے باہر میڈیا سے گفتگو میں اعظم سواتی نے کہا کہ یہ فیصلہ انسانی حقوق کی بنیاد پر ہوا جو اس بات کا ثبوت ہے کہ آج بھی عدالتیں حق اور انصاف کا فیصلہ دے سکتی ہیں۔

انہوں نے کہا کہ میں بانی پی ٹی آئی کا شکریہ ادا کرتا ہوں کہ مجھے اپوزیشن لیڈر چنا، کوشش کروں گا کہ بانی پی ٹی آئی سے میری ملاقات ہو، ہم شبلی فراز کی عزت کیلئے ان کی سیٹ کو خالی چھوڑیں گے، ان کو نااہل کرنا اچھا فیصلہ نہیں، کمپرومائز قبول نہیں کریں گے۔اعظم سواتی نے کہا کہ جس کو بھی سزا ہوگی پی ٹی آئی اس کے ساتھ کھڑی ہوگی،علیمہ خان کے ساتھ جو ہوا وہ کارروائی تیرہ اگست سے میرے گھر سے شروع ہوئی، اس سے عوام کا غم و غضہ بڑھ رہا ہے، علیمہ خان کے بیٹے کو فوری چھوڑا جائے۔

(جاری ہے)

قبل ازیں پشاور ہائیکورٹ میں اعظم سواتی کا نام پی این آئی ایل سے نکالنے کے لیے دائر درخواست پر جسٹس وقار احمد اور جسٹس کامران حیات میاں خیل نے سماعت کی۔وکیل درخواست گزار علی عظیم آفریدی ایڈووکیٹ کے مطابق اعظم سواتی کا نام پہلے ای سی ایل میں شامل کیا گیا تھا، عدالت نے نام نکالنے کے احکامات جاری کئے۔ عدالت نے فریقین سے جواب طلب کرتے ہوئے سماعت 9ستمبر تک ملتوی کردی۔