دکاندار لائسنس کے بغیر گندم میں رکھنے والی زہریلی گولیوں کی فروخت نہیں کرسکتے، اسسٹنٹ ڈائریكٹرپیسٹی سائیڈ سمبڑیال

جمعہ 22 اگست 2025 17:51

سمبڑیال (اُردو پوائنٹ اخبارتازہ ترین - اے پی پی۔ 22 اگست2025ء) اسسٹنٹ ڈائریکٹر پیسٹی سائیڈ اینڈ پلانٹ پروٹیکیشن سمبڑیال صبا تحسین نے کہا ہے کہ دکاندار لائسنس کے بغیر گندم میں رکھنے والی زہریلی گولیوں کی فروخت نہیں کرسکتے۔ انہوں نے دکانداروں کے نام اپنے پیغام میں کہا کہ حکومت پنجاب نے ہدایات جاری کی ہیں کہ تمام پیسٹی سائیڈ ڈیلرز ، کمیشن ایجنٹس ، کریانہ سٹور مالکان گندم گولی کی خریدو فروخت لائسنس کے بغیر ہرگز نہ کریں,خلاف ورزی کی صورت میں سخت کارروائی عمل میں لائی جائے گی اور اس سلسلہ میں گزشتہ ہفتے لائسنس کے بغیر گولیوں کی فروخت کرنے والے دکانداروں کے خلاف ایف آر بھی درج کرائی گئی ہیں۔

انہوں نے کہا کہ گندم میں رکھنے والی گولیوں کی سیل کے لئے لائسنس ، ڈیلر شپ ، انوائسز ، فروخت کا الگ سے ریکارڈ ، سٹاک کا ریکارڈ اورگاہک کا شناختی کارڈ جسے گندم گولی فروخت کی گئی دکاندارکے پاس ہونا ضروری ہے۔

(جاری ہے)

انہوں نے کہا کہ کم عمر بچوں ، خواتین اور ذہنی طور پر مفلوج لوگوں کو گندم کی گولیاں فروخت کرنا ممنوع ہے ، گندم گولی فروخت کرتے وقت خریدار سے شناختی کارڈ ضرور وصول کریں اور اپنے پاس باقاعدہ ریکارڈ رکھیں بصورت دیگر خلاف ورزی کرنے والوں کے خلاف قانونی کارروائی عمل میں لائی جائے گی۔ انہوں نے مزید کہا کہ گندم گولی کی غیر قانونی سیل کے بارے میں محکمہ پیسٹی سائیڈکو آگاہی دیں،آگاہی دینے والے کا نام صیغہ راز میں رکھا جائے گا۔