وزیراعلیٰ پنجاب کا ممکنہ بارشوں کے پیش نظر پیشگی انتظامات کرنے کیلئے کمشنرز وڈپٹی کمشنرزکوالرٹ رہنے کا حکم

جمعہ 22 اگست 2025 19:07

لاہور (اُردو پوائنٹ اخبارتازہ ترین - اے پی پی۔ 22 اگست2025ء) وزیراعلی مریم نوازنے ممکنہ بارشوں کے پیش نظر لاہور،راولپنڈی، ملتان، بہاولپور، ڈیرہ غازی خان، سرگودھا، گجرات اور گوجرانوالہ کے اضلاع میں پیشگی انتظامات کرنے کیلئے کمشنرزوڈپٹی کمشنرز کو الرٹ رہنے کا حکم دے دیا۔ ترجمان ایوان وزیر اعلیٰ کے مطابق وزیراعلیٰ نے سیلابی صورتحال سے نمٹنے کیلئے امدادی ٹیموں کو بروقت متاثرہ علاقوں میں متعین کرنے، آبادی کے بروقت انخلا کیلئے مساجد اور لائوڈز سپیکر پر اعلانات ،متاثرہ علاقوں کے مکینوں کو ایس ایم ایس مسیج بھیج کر آگاہ کرنے اورمتاثرہ علاقوں میں مویشیوں کی ویکسی نیشن وعلاج معالجہ کی سہولت کی فراہمی کو یقینی بنایا جائے ۔

اسی طرح پی ڈی ایم اے پنجاب انتظامیہ اور اداروں کودریائے جہلم، چناب، راوی وستلج سے ملحقہ علاقوں میں خصوصی انتظامات،دریائے ستلج سے ملحقہ علاقوں میں ریسکیو، انتظامیہ، پولیس و دیگر محکموں کو ضروری اقدامات اور دریائوں کے پارٹ میں مقیم آبادیوں کا فوری انخلا یقینی بنانے کی ہدایت کی گئی ہے ۔

(جاری ہے)

وزیراعلیٰ مریم نواز نے سیلاب متاثرین کے علاج معالجہ کیلئے کلینک آن ویل و فیلڈ ہسپتال متعین کرنے اورمال مویشی کی بروقت منتقلی کیلئے پیشگی اقدامات کرنے کا بھی حکم دیا ہے ۔

وزیر اعلیٰ نے کہا کہ پی ڈی ایم اے پنجاب کے پیشگی الرٹس،ایس او پیز اور ہدایات پر عملدرآمد یقینی بنایا جائے،وزیراعلیٰ کی ہدایت پر شعبہ زراعت، آبپاشی، ہیلتھ، جنگلات، لائیوسٹاک، لوکل گورنمنٹ اور محکمہ ٹرانسپورٹ نے الرٹ جاری کر دیا ہے ۔