Live Updates

مون سون بارشوں کا آٹھواں سپیل 23 اگست سے متوقع، پی ڈی ایم اے نے تمام محکموں کو الرٹ جاری کردیا

جمعہ 22 اگست 2025 20:10

راولپنڈی (اُردو پوائنٹ اخبارتازہ ترین - اے پی پی۔ 22 اگست2025ء) محکمہ موسمیات نے 23 اگست سے مون سون بارشوں کے آٹھویں سپیل کا امکان ظاہر کیا ہے۔ تفصیلات کے مطابق مون سون بارشوں کا آٹھواں سپیل 23 اگست سے شروع ہوگا۔ 22 اگست کی رات سے مغربی ہوائیں صوبے کے بالائی علاقوں میں داخل ہوں گی۔ ملک کے دیگر علاقوں کی طرح راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد اور وزیر آباد میں بارشوں کی پیشگوئی ہے۔

23 سے 27 اگست تک دریاؤں کے بالائی حصوں میں شدید طوفانی بارشوں کے باعث پانی کے بہاؤ میں اضافے کا خدشہ ہے۔ پی ڈی ایم اے پنجاب نے شدید بارشوں کے باعث دریاؤں میں پانی کے اضافے بارے الرٹ جاری کر دیا۔ترجمان پی ڈی ایم اے کے مطابق دریائے جہلم، چناب، راوی، ستلج اور ان سے ملحقہ ندی نالوں میں پانی کے بہاؤ میں اضافے کا خدشہ ہے۔

(جاری ہے)

پی ڈی ایم اے پنجاب نے صوبہ بھر کے کمشنرز و ڈپٹی کمشنرز کو الرٹ جاری کر دیا ہے۔

پی ڈی ایم اے نے دریائے ستلج کے پاٹ میں موجود شہریوں کو فوری محفوظ مقامات پر منتقل کرنے ہدایات جاری کی ہیں۔ دی جی پی ڈی ایم اے پنجاب عرفان علی کاٹھیا کا اس حوالے سے کہنا ہے کہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو الرٹ جاری کیا گیا ہے۔وزیر اعلیٰ پنجاب کی ہدایات کے پیش نظر تمام تر انتظامات پیشگی مکمل کریں۔

ہنگامی صورتحال سے نمٹنے کیلئے ریسکیو ٹیموں کو پیشگی حساس مقامات پر تعینات کریں۔موسلادھار بارش کی صورت میں شہریوں کو پیشگی آگاہ کریں۔ مساجد میں اعلانات اور لوکل سطح پر شہریوں کو محفوظ مقامات پر رہنے کی ہدایات جاری کی جائیں۔ شہریوں سے التماس ہے کہ ضلعی انتظامیہ اور ریسکیو اداروں سے مکمل تعاون کریں۔ پی ڈی ایم اے کی جاری کردہ ہدایات پر عمل کریں، شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔