ٌ بزنس کمیونٹی ماحولیاتی تحفظ اور فضائی آلودگی پر قابو پانے کیلئے پرعزم ہی: میاں ابوذر شاد

لاہور (اُردو پوائنٹ اخبارتازہ ترین - آن لائن۔ 22 اگست2025ء) صدر لاہور چیمبر آف کامرس اینڈ انڈسٹری میاں ابوذر شاد نے کہا ہے کہ کاروباری برادری ماحولیاتی تحفظ اور فضائی آلودگی پر قابو پانے کے لیے اپنی ذمہ داریوں سے بخوبی آگاہ ہے اور اس حوالے سے ہر ممکن اقدامات اٹھارہی ہے، حکومت اسے ہر ممکن سہولیات دے اور سپورٹ کرے۔ وہ ڈائریکٹر جنرل ماحولیات ڈاکٹر عمران حامد شیخ سے ملاقات کے دوران اظہار خیال کر رہے تھے۔

اس موقع پر لاہور چیمبر کے ایگزیکٹو کمیٹی ممبران سید سلمان علی اور وقاص اسلم بھی موجود تھے۔میاں ابوذر شاد نے کہا کہ لاہور چیمبر اور بزنس کمیونٹی ہمیشہ ماحولیاتی بہتری کے لیے حکومت کے ساتھ تعاون کرتی رہی ہے۔ انہوں نے کہا کہ انڈسٹری کے مسائل کا حل صرف سختی یا بندش میں نہیں بلکہ مشاورت اور باہمی تعاون ہے۔

(جاری ہے)

صدر لاہور چیمبر نے کہا کہ اگر صنعت کو اعتماد میں لے کر پالیسی بنائی جائے تو نہ ماحولیاتی آلودگی پر بہترین طریقے سے قابو پایا جاسکتا ہے بلکہ صنعتی ترقی اور روزگار کے مزید مواقع بھی یقینی بنائے جاسکتے ہیں۔

انہوں نے کہا کہ انہوں نے کہا کہ انڈسٹری پر پابندیاں عائد کرنے کے بجائے ٹیکنالوجی اپ گریڈیشن، ماحول دوست اقدامات اور سہولتوں کی فراہمی پر توجہ دی جائے۔ ماحولیات کی بہتری حکومت ،بزنس کمیونٹی اور سول سوسائٹی ، سب کی مشترکہ ذمہ داری ہے۔ لاہور چیمبر کے صدر نے کہا کہ پنجاب میں فضائی آلودگی کی سب سے بڑی وجہ ٹریفک، اس کے بعد فصلوں کی باقیات جلانا ہے جبکہ انڈسٹری کا اس میں حصہ صرف 9فیصد ہے لہذا سموگ اور ماحولیاتی آلودگی کا ذمہ دار صنعتوں کو ٹھہرانا درست نہیں۔

انہوں نے تجویز پیش کی کہ حکومت سکربرز اور ماحول دوست مشینری کی تنصیب کے لیے صفر مارک اپ پر قرضے فراہم کرے۔وہ انڈسٹریاں جو ماحول دوست اقدامات کر رہی ہیں انہیں خصوصی انعامات اور سرٹیفکیٹ دیے جائیں۔ انڈسٹری کے ساتھ براہِ راست رابطے کے لیے لاہور چیمبر میں سہولت ڈیسک قائم کیا جائے تاکہ مسائل بروقت حل ہوں۔ سموگ اور ماحولیاتی مسائل پر عوامی آگاہی مہم کو مزید موثر بنایا جائے تاکہ عام شہری بھی ذمہ داری کا مظاہرہ کریں۔

انہوں نے کہا کہ لاہور چیمبر نے ہمیشہ اپنی کمیونٹی کو سموگ اور ماحولیاتی مسائل سے نمٹنے کے لیے رہنمائی فراہم کی ہے اور آئندہ بھی انوائرنمنٹ پروٹیکشن ڈیپارٹمنٹ کے ساتھ ہر ممکن تعاون جاری رکھا جائے گا۔ڈی جی ماحولیات ڈاکٹر عمران حامد شیخ نے اپنے خطاب میں کہا کہ ماحولیات ایک سنگین مسئلہ ہے اور اس پر قابو پانے کے لیے انڈسٹری سمیت ہر طبقے کو ساتھ لے کر چلنا ہوگا۔ انہوں نے لاہور چیمبر کے کردار کو سراہتے ہوئے کہا کہ یہ ادارہ ہمیشہ ماحولیاتی بہتری کے لیے پیش پیش رہا ہے۔ انہوں نے انڈسٹری کے مسائل حل کرنے کے لیے ایک فوکل پرسن انجم ریاض کو مقرر کرنے کا اعلان کیا۔