فوج بلوچستان کے مسائل کے حل کیلئے عوام کے ساتھ کندھے سے کندھا ملا کر کھڑی ہے، فیلڈ مارشل

سید عاصم منیر کا بلوچستان کے علاقے تربت کا دورہ، سکیورٹی صورتحال اور ترقیاتی اقدامات کا جائزہ لیا گیا؛ آئی ایس پی آر

ساجد علی ہفتہ 23 اگست 2025 10:59

فوج بلوچستان کے مسائل کے حل کیلئے عوام کے ساتھ کندھے سے کندھا ملا کر ..

راولپنڈی ( اُردو پوائنٹ اخبارتازہ ترین۔ 23 اگست 2025ء ) آرمی چیف فیلڈ مارشل سید عاصم منیر کا کہنا ہے کہ فوج بلوچستان کے مسائل کے حل کیلئے عوام کے ساتھ کندھے سے کندھا ملا کر کھڑی ہے۔ مسلح افواج کے شعبہ تعلقات عامہ ( آئی ایس پی آر ) کے مطابق فیلڈ مارشل سید عاصم منیر نے تربت، بلوچستان کا دورہ کیا، فیلڈ مارشل کا تربت پہنچنے پر کور کمانڈر بلوچستان نے استقبال کیا، سید عاصم منیر کے اس دورے کا مقصد موجودہ سیکورٹی صورتحال کا جائزہ لینا، ترقیاتی اقدامات کا معائنہ کرنا اور بلوچستان میں استحکام اور خوشحالی کے لیے فوجی اور سول اداروں کے درمیان ہم آہنگی کو مضبوط بنانا تھا، وزیراعلیٰ بلوچستان میر سرفراز بگٹی، چیف سیکریٹری بلوچستان اور دیگر اعلیٰ حکام بھی اس موقع پر موجود تھے۔

بتایا گیا ہے کہ فیلڈ مارشل کو سکیورٹی کی مجموعی صورتِ حال، خطرات کے تناظر، فتنہ الہندوستان کے خلاف کامیاب آپریشنز، جاری ترقیاتی منصوبوں اور جنوبی بلوچستان میں سماجی و اقتصادی حالات بہتر بنانے کی کوششوں پر تفصیلی بریفنگ دی گئی، اس موقع پر سید عاصم منیر نے وزیراعلیٰ بلوچستان اور سول انتظامیہ کے نمائندوں سے ملاقات کے دوران گڈ گورننس، بنیادی ڈھانچے کی ترقی اور جامع و عوام دوست ترقی کی اہمیت پر زور دیا۔

(جاری ہے)

معلوم ہوا ہے کہ انہوں نے ان چیلنجز سے نمٹنے کے لیے سول اور عسکری اداروں کی مشترکہ کوششوں کی اہمیت کو اجاگر کیا، جن کا سامنا بلوچستان کے عوام کو ہے اور جنوبی بلوچستان کی سماجی و اقتصادی ترقی کے لیے کی جانے والی تمام کوششوں کے لیے غیر متزلزل حمایت کا اعادہ کیا، فیلڈ مارشل عاصم منیر نے بلوچستان کے عوام کے ساتھ پاک فوج کے کندھے سے کندھا ملا کر کھڑے رہنے کے عزم کا اعادہ کیا تاکہ امن، خوشحالی اور پائیدار ترقی کو یقینی بنایا جا سکے، فیلڈ مارشل نے جوانوں سے ملاقات کے دوران ان کے بلند حوصلے، عملی تیاری، اور قومی خودمختاری کے دفاع کے لیے غیر متزلزل عزم کو سراہا، انہوں نے مشکل حالات کے باوجود خطے میں امن و استحکام کے قیام میں ان کے کردار کو خراجِ تحسین پیش کیا۔